Opinion nga Redan BUSHATI
Kur unë, si gjithmonë e vazhdimisht kur kam kohë dhe mundësi, dilja në mbrojtje të vlerave reale, as komenti dhe përshkrimi i këtyre njerëzve që i vlerësoja nuk erdhi siç duhet, madje erdhi deri-diku me arrogancë, vetëm me një përjashtim, M.Dervishin. Vetëm ai (Melis Dervishi) pati guximin të më falenderonte, gjë që gjithsesi nuk e prisja, pasi unë thjesht bëj analiza, opinione e komente kur e shikoj të arsyeshme unë.
Porse, nga ju, vetë arbitrat e Shkodrës, jo vetëm që nuk u lëshua asnjë pipëtimë, por madje nuk e pritët aq mirë analizën time.
Sot, pas vendimit të FIFA-s, analiza ime e botuar në shtypin e huaj, po edhe në atë shqiptar (“Sporti Shqiptar”, “ShkodraSport” (https://www.shkodrasport.com/index.phpoption=com_content&view=article&id=2867%3Aarbitrat-shkodrane-gjykojne-mire-por-stemen-e-fifa-s-nuk-e-meritojne&catid=70%3Aopinione&Itemid=117&lang=sq), “Republika”, “Nacional Albania” etj.) më jep të drejtë. Ndërkohë që ju vazhdoni të flini mbi dafina. Shkodra e pat një gjyqtar me stemën e FIFA-s, tashmë nuk ka më asnjë. Sa është faji i Federatës Shqiptare të Futbollit, po aq, në mos më tepër, është i juaji, i Kolegjiumit të Arbitrave të Shkodrës. Kjo, pasi në kohën kur duhej të ngrinit zërin, ju zgjodhët të heshtni; e atëherë kur çdo gjë është në qetësi, ju merrni të flisni, por çe do, s’ju dëgjon kush, se ka ikur momenti. Kësisoj, edhe pse do t’iu vijnë rëndë këto fjalë, por që qëndrojnë si statujë në këmbë, se janë të vërteta dhe plotësisht të drejta (së fundmi edhe vendimi i FIFA-s, i jep të drejtë analizës në fjalë) kapni momentin dhe kohën! Veproni siç duhet, pasi Shkodra ka gjyqtarë të talentuar, që e meritojnë më shumë se të tjerët stemën e FIFA-s. Zgjidheni këtë çështje, se ato djem e vajza, disa prej tyre, janë vërtet arbitra të mirë. Mos i merrni më qafë. Këto nuk janë biseda kafenesh dhe miqsh. Këto duhet të jenë biseda profesionale, të zhvilluara nga profesionistë të fushës.
