Kroati Sime Vrsaljko e ka përfunduar eksperiencën me Interin përpara kohe, pasi mbrojtësi do t’i nënshtrohet një operacioni, për t’u rikthyer më pas te Atletico e Madridit, skuadër që zotëron kartonin e futbollistit.
Zikaltërit janë hedhur menjëherë në kërkim të një zëvendësuesi, ndërsa në janar kanë afruar në huazim mbrojtësin portugez Cedric Soares, i cili do të jetë pjesë e Interit deri në fund të sezonit dhe më pas në varësi edhe të performancës së tij, Interi do të veprojë për ta blerë ose jo.
Gjithsesi Marota dhe Ausilio nuk duan të gjenden të papërgatitur dhe sipas raportimeve të mediave pranë klubit zikaltër, kanë pasur një takim me menaxherin e Elseid Hysajt, Mario Xhiufredi, ku po synohet që Hysaj të bëhet pjesë e zikaltërve.
Megjithatë varet shumë jo vetëm nga oferta e Interit, por edhe nga kërkesat e napolitanëve për mbrojtësin shqiptar që edhe pse ka qenë ndër më të spikaturit në tri sezonet e fundit, duket se nuk po e gjen veten aktualisht në formacionin e parë. Ndoshta që nga qershori i ardhshëm ai mund të bëhet pjesë e Interit./vipsport/
