Boksieri shkodran Senad Gashi muajin e ardhshëm do të ngjitet sërish në ringun gjerman për të zhvilluar një tjetër finale të madhe.
Përballë Tom Schwarz ai do të tentojë t’i rrëmbejë këtij të fundit titullin e Kampionit të Botës në Federatën WBO.
Ndeshja në mes tyre do të zhvillohet në një nga arenat më të mëdha të boksit botëror dhe europian, pikërisht në atë të Berlinit.
27 vjeçari i lindur në Shkodër, ka vite që jeton në Gjermani dhe pas karrierës së shkëlqyer si amator, tashmë ka nisur rrugën e profesionalizmit.
Deri më tani çdo gjë i ka shkuar mirë. Ka zhvilluar 16 ndeshje dhe i ka fituar të gjitha. Mban titullin e kampionit në Federatën WBS Silver, atë të kampionit ndërkombëtar gjerman në BDB dhe titullin kampion botëror në Federatën GBU.
Tashmë synon të ngjitet edhe më lart duke provuar veten në një Federatë tjetër, atë të WBO, në të cilin titullin e kampionit të Botës prej dy vitesh e mban pikërisht Tom Schwarz.
Ky i fundit është 23 vjeç, katër vite më i ri se Gashi megjithatë dueli pritet të jetë shumë i fortë dhe interesant.
Boksieri shkodran ka ambicje të mëdha për të bërë përpara në karrierë dhe deri më tani ka treguar se është shumë i suksesshëm.
Do të tentojë ta bëjë këtë gjë edhe në sfidën e 21 prillit. Ditën e sotme është bërë edhe prezantimi i parë i dy kundërshtarëve të kësaj sfide dhe Senad Gashi padyshim që ka dashur t’i tregojë rivalit të tij se muajin e ardhshëm titullin do t’i kalojë atij.
Me origjinë nga Shkodra, i rritur në Kosovë dhe duke jetuar prej shumë vitesh në Gjermani, ai ka nisur një rrugëtim shumë të suksesshëm në boksin profesionist.
Ai merr pjesë prej tre vitesh në këtë lloj boksi, ku ka zhvilluar deri më tani 16 ndeshje dhe i ka fituar të gjitha.
Në këtë mënyrë, gjeografia e sportistëve të suksesshëm shkodranë nëpër botë zgjerohet dhe më shumë. Senad Gashi është një tjetër dhe titujt e shumtë që ka fituar, kuptohet që shkojnë edhe për Shkodrën e Shqipërinë.
Ai ka shumë vite që jeton në Gjermani, gati 20 vjet. Bokson në peshat e rënda, mbi 100kg, sepse konstrukti i tij fizik është i tillë.
Karriera e tij ka njohur vetëm rritje. Aktualisht mban pozicionin e 14-të në një rang-listë të boksierëve më të mirë gjermanë që janë në aktivitet dhe po ashtu vendin e 107-të në mes 1286 boksierëve në botë.
Nisja e karrierës si profesionist është shumë e mirë me 16 fitore në po aq ndeshje të zhvilluara. Tashmë duhet të presim muajin prill, për të shijuar edhe të 17-ën, bashkë edhe me titullin botëror në federatën përkatëse.
Gjergj KOLA
