Shkupi dhe Drita ishin dy skuadrat shqiptare që arritën të kualifikohen në Kupat e Europës. Kështu, skuadra e Shkupit ka arritur të kualifikohet për në raundin e dytë të Champions League, pavarësisht humbjes 0-2 me Lincoln Red Imps, kampione e Gjibraltarit.
Kampionët e Maqedonisë së Veriut vinin në këtë sfidë pas fitores 3-0 në ndeshjen e parë dhe kjo humbje nuk i pengoi për të vazhduar më tej, ku në raundin e dytë do të përballen me kroatët e Dinamo Zagreb.
Në Conference League, Drita ka marrë një fitore të rëndësishme 3-0 përballë Inter Turku, që i jep të drejtën për të vazhduar në raundin e dytë të këtij kompeticioni, ku do të takohet me belgët e Antwerp. Pas humbjes 1-0 në ndeshjen e parë në Finlandë, gjilanasit shpërthyen në stadiumin “Fadil Vokrri”, duke shënuar me Simonovski në minutën e dytë dhe me Mujën në minutat 49-të dhe 51’.
Ndërkohë, skuadra e Ballkanit, kampione e Kosovës, është eleminuar në raundin e parë të Champions pas humbjes 1-0 të pësuar në fushën e skuadrës lituaneze, Zalgiris. Pas ndeshjes së parë të mbyllur në barazim 1-1, në ndeshjen e kthimit u desh koha shtesë për të përcaktuar skuadrën e kualifikuar.
Një gol në minutën e 97-të u dha të drejtën kampionëve të Lituanisë për të vazhduar më tej. Ballkani do të zbresë në Conference League, ku e pret La Fiorita, ekip i San Marinos.
Maringlen ZHIVANI
