Fundjavën e kaluar u mbyll edhe faza e dytë e kampionatit. Ekipet e shohin veten me gjysmën e pikëve që kanë grumbulluar deri tani dhe me një kalendar që ndërtohet sipas formulës së përcaktuar më parë.
Një formulë që favorizon skuadrat e dyta apo të treta në luftën për vendin e parë që të çon në Superiore, ndërsa u jep mundësi edhe ekipeve të fundit që të jenë në garë deri në momentet finale për t’i shpëtuar rënies.
Tani nis një kampionat tjetër për skuadrat ku janë krijuar dy minigrupe, i pari ku luftohet për vendin e parë dhe i dyti për t’i shpëtuar rënies nga kategoria. Vllaznia nuk gabon në shtëpi dhe fiton 2- 0 ndaj Ilirisë, ndërsa në prag të fazës së tretë e sheh veten +6 pikë nga vendi i dytë që mbahet nga Erzeni. Për shkodranët asgjë nuk ka përfunduar dhe do t’i duhet të luftojë fort për të ruajtur vendin e parë deri në fund.
Shijakasit mbeten në krizë ku në tri takimet e fundit kanë pësuar dy humbje dhe kanë marrë një barazim. Në sfidën e së shtunës të luajtur në fushën asnjanëse të Rrogozhinës, Erzeni nuk shkoi më shumë se barazimi 0-0 përballë Vorës. Dinamo e mbylli fazën e dytë me humbje duke u mundur në Pezë nga Burreli. Blutë janë në vendin e fundit në 5-shen e parë, ndërsa kanë nisur të mendojnë që tani për sezonin e ardhshëm.
Besëlidhja ka mundur Korabin me rezultatin e pastër 3-0 dhe duket se po kalon një formë të mirë. Por, skuadrës lezhjane i duhet vazhdimësi në fazën e tretë dhe të shpresojë që të ndalet Vllaznia për të synuar vendin e parë. Shtatë pikë janë shumë.
Veleçiku e ka mbyllur siç duhet fazën e dytë duke fituar ndaj Shënkollit me rezultatin 1-0. Por, koplikasit kanë pretendime për kalendarin, ku sipas tyre përdoren dy standarde, një për 5-shen e parë dhe një tjetër formulë për 5-shen e dytë.
