Skënderbeu fitoi për herë të parë në histori Kupën e Shqipërisë pas suksesit 1-0 në “Elbasan Arena” kundër Laçit.
Ky ishte trofeu i parë për bardhekuqtë në këtë kompeticion, por vuajtën shumë përballë një kundërshtari që i vuri shumë herë në vështirësi.
Gjithsesi mënyra sesi erdhi kjo fitore le vend për diskutim, pasi gjyqtari Eldorian Hamiti akordoi një penallti të diskutueshme në favor të Skënderbeut, e kthyer në gol nga mesfushori Sabien Lilaj.
Menjëherë pas përfundimit të ndeshjes presidenti i Laçit, Pashk Laska, u fut në në fushë duke i kërkuar llogari arbitrit për penalltinë e dhënë.
Laska duket tepër i irrituar dhe kërkon të sqarohet nga gjyqtarët për veprimin e tyre, por menjëherë shkuan forcat e sigurisë për ta nxjerrë jashë presidentin e kurbinasve, ndërsa arbitrat shoqërohen nga siguria deri në dhomat e zhveshjes.
Në fakt, në fillim kryesori Hamiti akordoi për një goditje këndi, por pas ndërhyrjes së arbitrit pas portës, ai akordoi 11-metërsh.
Ky episod do të diskutohet gjatë, pasi ndeshja u vendos nga kjo penallti, e cila u kthye në gol në minutën 67’ nga Lilaj.
