Një tjetër lajm i mirë për Kristian Panuçin pas konfirmimit në postin e trajnerit të përfaqësueses, pavarësisht dështimit në Ligën e Kombeve.
Në renditjen e re të FIFA-s, Shqipëria nuk do të humbasë pozicione, edhe pse pësoi një humbe të rëndë në shtëpi përballë Skocisë.
Falë formulës së re, si për fitore, ashtu edhe për humbje, lëvizjet janë minimale. Ndaj në renditjen e re që pritet të publikohet pas pak ditësh, Shqipëria nuk do të lëvizë nga vendi i 60 ku gjendej edhe një muaj më parë.
Në të njëjtat pozita Shqipëria ka qenë edhe në muajin janar, që do të thotë se kuqezinjtë kanë qëndruar në vendnumëro për thuajse një vit të plotë me luhatje të vogla.
Ajo që vazhdon të bëjë hapa para në renditje është Kosova. Kjo e fundit, falë dy fitoreve në Ligën e Kombeve, do të ngjitet në vendin e 131-të, duke përmirësuar me 6 vende pozitën dhe rekordin e saj të mëparshëm në këtë renditje ku pritet që brenda një kohe të shkurtër, të bëhet pjesë e 100 vendeve të para. Kosova e ka filluar këtë vit në vendin e 178 në renditjen botërore të FIFA-s. /vipsport/
