Shqipëria do të duhet të përballet edhe me një atmosferë elektrizuese në Reikjavik, ku do të luajë përballë Islandës vendase në fundjavën e ardhshme. Skuadra e drejtuar nga Edi Reja, përtej vështirësisë së një kundërshtari që luan të gjitha shanset e tij, do të jetë në një stadium ku një javë para sfidës, kanë mbetur vetëm pak bileta pa u shitur.
Që nga viti 2013, kur Islanda filloi të bënte hapa para dhe të siguronte pjesëmarrje të rëndësishme në play-off e më pas në fazën finale të Europianit e Botërorit, tifozeria në këtë vend është kthyer po aq protagoniste sa edhe vetë lojtarët në fushë, tifozeria e cila bëri të famshme “duartrokitjen vikinge” gjatë Europianit, ka qenë e shumtë në numër në thuajse të gjitha ndeshjet në shtëpi duke mbushur stadiumin e “Laugardalsvollur” dhe kështu do të jetë edh enë këtë sfidë.
Njoftimin e jep vetë federata islandeze e cila me një postim ka sqaruar që të premten se sa pak bileta kishin mbetur për t’u shitur për duelin në impiantin i cili ka një kapacitet prej 9800 vendesh. “Rëndësia e ndeshjeve në shtëpi nuk ka nevojë që të përmendet, ashtu si impakti që mund të ketë një mbështetje e fortë.
Deri në momentin që flasim, rreth 2100 bileta kanë mbetur për t’u shitur për ndeshjen kundër Shqipërisë’, shkruante Federata Islandeze për duelin në fjalë të premten,.
Sipas mediave vendase, kjo do të jetë një ndeshje me stadium të mbushur plot, edhe për faktin se ekipi nuk luan aty një ndeshje që nga tetori i vitit të kaluar. /vipsport/
