Ish- kapiteni i Vllaznisë Ndriçim Shtubina katër ditë më parë është bërë objekt i një sherri me disa prej futbollistëve kuqeblu gjatë ndeshjes Vllaznia- Laçi.
Një pretendim për 11-metërsh i lojtarit të ekipit kurbinas, nuk është pritur mirë nga shkodranët që e kanë konsideruar simulim të tij dhe i kanë tërhequr vëmendjen se gjëra të tilla nuk i shkojnë.
Aq më tepër kur për shumë vite ka qenë pjesë e Vllaznisë.
Megjithatë vetë Shtubina në një prononcim për “Panorama Sport” ka shpjeguar gjithçka ka ndodhur në këtë ndeshje.
Në ndeshjen e fundit Vllaznia-Laçi, keni pretenduar për një 11-metërsh, ndërsa Gilman Lika ju ka tërhequr vëmendjen për simulim. Gjithashtu jeni vërshëllyer nga tifozëria shkodrane. I prisnit këto reagime?
Në radhë të parë, dua të theksoj se ne të gjithë jemi profesionistë. E duam Vllazninë, por të mos harrojmë që duam momentalisht atë skuadër ku shërbejmë si futbollist.
Unë jam pjesë e Laçit në rastin konkret dhe “bukën” e ha në këtë klub. Nuk kam se si të mos luaj për këtë skuadër, qoftë edhe kundër Vllaznisë sepse për këtë paguhem.
A mund të na sqaroni çfarë ndodhi në fushë?
U ndjeva keq sepse disa lojtarë më kanë thënë gjatë lojës: “Çfarë ke që je duke luajtur kaq fort kundër nesh”.
Si për ata dhe për të gjithë të tjerët, që ta marrin vesh, unë luaj për ekipin që jam dhe i bëj hyzmetin fanellës që vesh.
Vllazninë e kam në zemër dhe nuk ma mohon asnjëri, por në fushë jemi ndryshe. Për sa i përket asaj përplasjeje që pata me disa lojtarë të Vllaznisë, dua që të them se aq sa unë kam luajtur me fanellën kuqeblu, ata nuk kanë shikuar ndeshje të Vllaznisë nga stadiumi.
Prandaj, nuk kanë se si të më kërkonin shpjegime dhe të bënin skena në ato moment, qoftë edhe për të ndikuar te tifozëria.
E ritheksoj se loja që bëra ndaj Vllaznisë, ka të bëjë me anën profesionale dhe me asgjë tjetër.
