Luhet Superiorja, java e parafundit, ndaj edhe vëmendja kryesore është pikërisht te ndeshjet e ditës së sotme.
Kjo shihet edhe nga hapësira që kanë marrë në dy gazetat e përditshme sportive.
Në “Panorama Sport” ka një analizë të dy ndeshjeve të fundit, shanset për Europën dhe mbijetesën për ekipet që luftojnë, ndërkohë që një vend të rëndësishëm zë Skënderbeu, që ende nuk ka paguar gjobën prej 1 milion eurosh që UEFA i ka vendosur.
Protesta e tifozëve të Vllaznisë gjithashtu ka marrë vëmendje.
Nga bota deklarata e Platini për “Francë 1998” është ndër lajmet kryesor të ditës, ashtu sikurse FA Cup dhe Kupa e Gjermanisë.
Në “Sport Ekspres” Daja është në “majë”. Trajneri korçar flet për rinovimin dhe lëvizjet e lojtarëve, ndërkohë kampionati i ka sytë nga Kamza, pasi aty vendoset se kush qëndron në Superiore.
Vllaznia mund të rrëzohen nëse skuadra e Ahmatajt mund Laçin. Por ka edhe akuza.
Tirana dhe ndeshjet e tjera të Superiores kanë hapësirën e vet në faqen e parë të kësaj gazete, ndërkohë qe te bota edhe në SE vëmendje kanë marrë finalet e kupave në Angli e Gjermani, si dhe deklarata e Platini. /EDS/
