Ka shënuar gol që në miqësoren e parë por jo vetëm kaq. Ka zhvilluar një ndeshje shumë të mirë dhe po ashtu, pëlqehet edhe nga stafi teknik.
Bëhet fjalë për futbollistin Silvio Zogaj. 21 vjeçari ka luajtur fillimisht me Akademinë Brians, më pas për tre vite ka qenë pjesë e Akademisë Vllaznia por në moshën 19 vjeçare, dikush nuk besoi tek ai për ta kaluar tek ekipi i parë dhe lojtari lezhjan “mori arratinë”.
Fillimisht në Gjirokastër tek Luftëtari ndërsa në sezonin e fundit ka qenë pjesë e Laçit. Mosgjetja e shumë hapësirave atje, ka bërë që ai të kërkojë “strehë” sërish tek Vllaznia dhe i kanë mjaftuar 2-3 seanca për të treguar vlerat e tij.
Në miqësoren ndaj Veleçikut ka shënuar golin e vetëm për kuqeblutë, por edhe ka asistuar dy herë të tjera për shokët e ekipit.
Po tregon një formë shumë të mirë sportive dhe me shumë siguri do të jetë pjesë e tyre për sezonin e ri. Zogaj luan si mesfushori i avancuar krahu dhe pritet të bëjë mirë për skuadrën shkodrane sepse i ka aftësitë për këtë gjë.
© shkodrasport.com
