Golashënuesi më i mirë në historinë e klubit shkodran por edhe i kampionatit shqiptar të futbollit, Vioresin Sinani, është i bindur se Vllaznia e sezonit aktual është më e mirë se ajo e një sezoni më parë. Pavarësisht rezultateve jo bindëse në ndeshjet e para, ish-sulmuesi i njohur sërish ka besim për ndryshim të situatës dhe për rrjedhojë u bën thirrje të gjithëve për të mos e kryqëzuar ekipin.
“Jam i mendimit se Vllaznia e sivjetme është më e mirë se ajo e një sezoni më parë. Vërtetë skuadra nuk ka bindur gjatë ndeshjeve të deritanishme por duhet t’i japim pak kohë dhe nuk duhet ta kryqëzojmë që tani. Jam shumë i bindur se me kalimin e javëve kemi për të parë një skuadër krejt tjetër në fushën e lojës dhe Vllaznia do të ngjitet në atë vend që i takon në tabelën e renditjes. Unë kam shume besim tek Cungu dhe futbollistet qe ai drejton”- është shprehur autori i 208 golave në kampionatin shqiptar.
Një nga pikat më të dobëta të skuadrës kuqeblu aktualisht është mungesa e një njeriu-gol dhe për këtë, Sinanit i vjen keq por shpreson që ky problem të kalojë dhe me golin të mos jenë të lidhur vetëm sulmuesit por edhe lojtarët e tjerë të skuadrës. E rëndësishme sipas tij është që dikush të shënojë dhe skuadra të mos vuajë në këtë drejtim.
© shkodrasport.com
