Barazimi ndaj Tiranës në javën e parë të kampionatit është lënë pas dhe Kukësi tani është i fokusuar te përballja e radhës, ajo me Vllazninë në transfertë. Në kampin verilindor janë optimistë se do të vijë fitorja e parë në kampionat, edhe pse e kanë të qartë se nuk do ta kenë aspak të lehtë. Në sfidën me bardheblutë lojtarët kryen disa gabime, të cilat për pak mund t’i kushtonin edhe barazimin, ndërsa stafi teknik synon që ato të mos përsëriten më përballë shkodranëve.
Për këtë arsye, në klub kanë kryer edhe analizën e zakonshme pas një ndeshjeje, ku edhe kanë nxjerrë defektet në këtë takim. Duke nisur nga goditjet standarde dhe roli i mesfushorëve për të thyer aksionet, në Kukës shpresojnë që të shohin një skuadër ndryshe ndaj Vllaznisë. Gjithsesi, për momentin nuk priten lëvizje të titullarëve, sepse mungojnë alternativat për shkak të dëmtimeve dhe lojtarëve që ende nuk janë në formën e tyre maksimale.
GODITJET STANDARDE
Ndonëse Kukësi u përpoq të ishte i kujdesshëm në mbrojtje dhe të mos pësonte gol, në fund u ndëshkuan nga një goditje standarde. Pikërisht, këtë gjë Gega nuk e “përtyp” dot, sepse në momentin e goditjes së këndit lojtarët duhet të markonin më mirë, për të mos i dhënë mundësinë kundërshtarit që të godiste. Për këtë arsye, në seancat stërvitore të radhës u është kushtuar një rëndësi e veçantë sjelljes së lojtarëve dhe markimit në zonë gjatë momentit që kundërshtari do të ketë mundësinë e ekzekutimit të një goditjeje të ndaluar.
ROLI I MESFUSHORËVE
Ndoshta, po të mos ishte për meritë të portierit Angelo Tafas, që ka evituar disa gola të sigurt, Kukësi mund të dilte i mundur nga fusha në ndeshjen me Tiranën. Thuajse të gjitha rastet e bardhebluve ishin në qendër të zonës, me mbrojtjen e Kukësit që u gjend në shumë momente e papërgatitur. Në një situatë të tillë, ndaj Vllaznisë, trajneri Skënder Gega kërkon më shumë impenjim të mesfushorëve në rastet e sulmeve të kundërshtarëve, në mënyrë që të mos lejojnë afrimin e tyre në zonë dhe thyerjen e aksioneve shumë larg portës. Mbetet për t’u parë nëse direktivat e rinj do të arrijnë të sjellin një tjetër Kukës, kësaj here në Shkodër. Takimi do të luhet ditën e shtunë në orën 17:00 në “Loro Boriçi”, teksa do të transmetohet edhe në “RTSH”.
