Lojtarët e Bolton-it kanë vendosur se nuk do ta luajnë ndeshjen e Championship-it kundër Brentford, e cila është programuar të zhvillohet këtë të diel.
Ky qëndrim ka ardhur për shkak se lojtarët nuk kanë marrë akoma rrogat e muajit mars, ndërsa rrogat për muajin prill pritet të shpërndahen në fillimin e javës së ardhshme.
“Kriza e gjatë financiare në klubin tonë është e njohur për të gjithë”, lexohet në deklaratën e bërë nga lojtarët. “Futbollistët dhe pesë pjesëtarë të stafit teknik nuk kanë marrë akoma rrogat e muajit mars. Kemi vazhduar të punojmë dhe të stërvitemi në këtë moment të vështirë, por asnjë zgjidhje nuk duket në horizont”.
“Mendonim se shitja e mundshme e klubit do të kishte sjellë një zgjidhje, por vështirësitë për ta realizuar shitjen na kanë lënë në vend. Kjo është një situatë shumë e rëndë psikologjike dhe financiare për të gjithë ne”.
Ken Anderson, pronari i Bolton-it, nuk i ka paguar lojtarët e tij në kohë as në muajin shkurt. Futbollistët nuk u stërvitën për 48 orë këtë muaj, sepse nuk kishin marrë asnjë informacion në lidhje me situatën.
Ndërsa një pjesë e stafit teknik është paguar për muajin e kaluar, kjo nuk ka ndodhur me lojtarët, të cilët kanë vendosur të futen në grevë dy ndeshje para fundit të sezonit.
Anderson po punon për t’ia shitur klubin ish-pronarit të Watford-it, Laurence Bassini, oferta e të cilit nuk është ratifikuar akoma nga Football League.
Bolton mban vendin e parafundit në Championship dhe sezonin e ardhshëm do të luajë në League One, kategoria e tretë e futbollit anglez.
