Trajneri i Partizanit, Skënder Gega, ka komentuar fitoren ndaj Egnatias në Kupë, duke e cilësuar një hap të mirë në rrugëtimin e skuadrës së tij.
“Duhet vlerësuar çdo lloj ekipi, por Egnatia është kualitet, edhe pa qenë pjesë e Superiores, kam thënë që Egnatia është me lojtarë me shumë eksperiencë që ne na mungon. Përveç Hoxhës, pjesa e madhe e tyre janë shumë të rinj. Në këtë kohë të shkurtër është shumë e vështirë të bësh ndryshime radikale. Por nga ndeshja e kaluar, duke parë edhe shkallën e vështirësisë, jam i kënaqur për mënyrën se si i interpretuan detyrat, se këto ishin detyrat. Gabimet janë të pashmangshme, por impenjimi, disiplina taktike e sakrifica, bëjnë të ndjehem mirë.
Nuk është mbyllur asgjë. Është pjesë e parë e mirë. Jemi me një gol avantazh por asgjë nuk ka mbaruar. Ndryshe mund të shprehesh në mbrojtje, ndryshe në fushën tënde ku mendon se je në kontroll. Por me balanca, kemi kohë për të menduar për ndeshjen e dytë. Gjithsesi duhet rikuperimi se është numër i limituar lojtarësh, ndonëse kemi 22 vetë, por kanë disnivele nga eksperienca e minutazhi. Sot u mundova të aktivizoj një të ri që para tre ditësh e kam parë për herë të parë, Mintongo. Kisha besim, më pëlqeu mënyra e disiplina, edhe fizikisht patjetër shfaqi problem, por t’i fitojmë një nga një, është vetëm fillimi.
Taktikisht detyra ishte e njëjta, vetëm një gjë e pashmangshme lodhja e tyre. Edhe me Laçin unë i kam ndjekur nga afër Eleke e Bintsuka, ky i fundit është përdorur në çdo pozicion. Eleke luajti po nuk është 100%, por kur janë të freskët janë të qartë taktikisht e nuk lëshojnë në momentin që u bie karburanti. Duhet ndërrimet dhe ata janë të ndërgjegjshëm që kemi ndeshje pas pak ditësh. E rëndësishme është që të gjithë e kuptojnë që nuk mund të rrish në fushë nëse je i lodhur, i bën dëm vetes e ekipit. Edhe Koten e ndërrova me Laçin se ka cilësi por nuk kam dëshirë të përpëlitet për shkak të minutazhit. Ndaj i aktivizojmë pjesë-pjesë. Por nuk mund të mohojmë cilësinë e Egnatias, duken si ndryshojnë lojën, bëjnë presionin me shumë eksperiencë e ndeshje në kurriz. Ne jemi shumë të rinj, e reja të jep shpresë e besoj që do shkojmë në rrugën e duhur. Por nuk mund të them çfarë do ndodhë as në ndeshjen tjetër, të shohim me optimizëm për të ardhmen, është vetëm një ndeshje.
Osmanllari ndoshta ka një moshë që nuk është i ri, por për mua është i ri. Më e arsyeshme mendova se ai luan aty, i dhashë mundësi të shkëputej pak. Buxhelaj është sakrifikuar gjithmonë me besim që kudo ta çosh nuk i mungon shpejtësia, bën edhe presionin lart, nuk abuzon, është shumë i bindur për të bërë pjesën e tij. U munduam të ngjishemi e herë pas herë të mos dalim, por pa bërë ndryshime të mëdha në krah e detyra. Vështirësia ishte e Bytyçit, i cili nuk është me të majtën, por porta është në mes prapa, nëse futej në mes e dublonte e bënte më të lehtë. Të gjithë dhanë kontributin, por jam i kënaqur për lojtarët e qendrës se luajtëm me mënyrën e mirë, e kam insistuar që nëse luajmë në këtë mënyrë, njëri markon e tjetri dublon… Është problem me eksperiencën, bindjen, do kohën e vet, patjetër, do kuptojnë për atë që do jap e kut punojmë do të jemi shumë të ndërgjegjshëm.
Padstrelau është fizikisht ai që bën më shumë sakrifica. Kemi staf që punojmë, bëjmë matjet, kemi informacion vërtet sa të ngarkuar janë. Bintsuka nuk doja t’i jepja ultimatum që këtë radhë nuk do luash se kemi ndeshje të rëndësishme, por të luante derisa fizikisht nuk ka më. Nuk desha të fusja shumë në lojë, se ndoshta nga intensiteti mund ta rrezikonim. Fjala shqip është shtrëngo-liro. Në këtë aspekt Bintsuka nuk kishte çfarë të jepte më, Eleke jo e jo. Por me aq sa luajtën e ato situata bënë më të mirën e tyre. Por kanë shumë rezerva, në momentin që rikuperohen e kuptojnë njëri-tjetrën, kanë mundësi të bëjnë më mirë.
Roli i Kekos? Këtu fokusohen pas një dëshire që kanë pasur në fëmijëri, njëri thotë jam 9, tjetri 10. Detyra e trajnerit është të kuptosh ku i ka të dhënat më shumë Keko. Nuk i mungon shpejtësia, driblimi, patjetër duhet të zgjidhet, por është punë edukimi taktik. Ka vetitë dhe mund të luajë 2-3 pozicione por ka veti që është i guximshëm, njeh portën, luan një kundër një. Eleke nuk po e bënte dot, nuk e shërbyem. Mënyra si ndihmon ekipin më pëlqeu dhe shpresoj të mos na dëgjojë Keko se thotë jam 9-sh përgjithmonë. Edhe unë kam dashur të isha 10-sh, por kurrë nuk u bëra 10-sh.
Rikuperimi? Gjëja që më shqetëson më shumë por të shohim. Do mundohem sa më shumë ë punojmë se tani nuk ka më ngarkesa, i kemi të gjitha kushtet. Në kohën që isha më parë duhet të loja fushën pas 90 minutave se vinte ekipi tjetër. Sot kemi rezidencën tonë, do bëjmë më të mirën. Urojmë deri në derbi t’i mbajmë larg presionit e më këmbë në tokë. Do kisha dëshirë të mos ishte kjo ndeshje në mes, por ndonjëherë del për mirë në kohën e momentin e duhur. Ta shohim pak me optimizëm se kështu është sporti”, tha Gega për RTSH pas ndeshjes.
