Para javës së fundit të kampionatit janë shtuar shumë akuzat për lojë të pandershme nga disa skuadra, kryesisht ndaj Skënderbeut, që i ka mbyllur llogaritë e titullit kampion dhe ka pësuar disa humbje radhazi.
Akuzat vijnë direkt nga palët e prekura dhe dje në mbrëmje ishte sërish Kryebashkiaku i Kamzës, Xhelal Mziu, i cili u shpreh i bindur për fitoren e Vllaznisë në Korçë.
Ai akuzoi se po bëhet një lojë e pistë në dëm të Kamzës dhe në shënjestër kishte Skënderbeun, që sipas tij, po legjitimon akuzat që janë bërë për të.
Por në Korçë as duan t’ia dinë për këto akuza. Interesimit të “Vipsport.al” për ndonjë reagim në lidhje me akuzat e Mziut, drejtuesit e klubit jugor i janë përgjigjur se “po mendojnë vetëm për festën e titullit”.
Po ashtu, drejtuesit korçarë nuk kanë dashur të reagojnë edhe për deklaratat e Shkëlqim Muçës në lidhje me faktin se Skënderbeu nuk do të luajë në Kupat e Europës.
Skënderbeu pret Vllazninë të mërkurën dhe pritet të luajë me një formacion miks, me disa titullarë dhe disa lojtarë stoli. Nuk ka interes për rezultatin, ndërsa Vllaznia lufton për mbijetesë.
Pas ndeshjes do të zhvillohet ceremonia zyrtare e titullit kampion dhe në klubin bardhekuq po mendojnë vetëm për festën e së mërkurës në mbrëmje. / Vipsport.al
