Pas më shumë se një muaj pritjeje, edhe Besëlidhja, më në fund, e ka trajnerin e saj të ri për sezonin e ardhshëm. Mund të konsiderohet në një farë mënyre surprizë, por ai shtë Sokol Meta. Kur të gjithë prisnin të shihnin në pankinën e lezhjanëve ndonjë emër tjetër, mbrëmë është mësuar dhe në mënyre zyrtare emri i teknikut të ri të Besëlidhjes. Duket se presidenti Gjokë Noka ka preferuar që të zgjedhë në krye të pankinës një trajner, edhe pse jo shumë me emër, por që është punëtor, me energji të reja, kurajoz dhe me ego e ambicje për të shkuar sa më lart, qoftë me ekipin, që ai drejton, por edhe profesionalisht. Gjatë kësaj periudhe, Meta nuk ka qenë emri i vetëm që është lakuar për pankinën e lezhjanëve. Madje mund të themi se emri i tij nuk është përmendur fare, kur kemi parasysh se janë lakuar emra nga Shkodra, Lezha dhe Tirana, por jo i Sokol Metës. Duket se presidenti ambicjoz, Gjokë Noka, ka vlerësuar me gjakftohtësi çdo alternativë dhe në fund ka vendosur për trajnerin e ri, duke i besuar pasionit, dëshirës për punën dhe si një njeri që mund të çojë projektin e tij deri në fund, pra që Besëlidhja të ngjitet në Superligë. Sokol Meta, që më parë ka qenë futbollist i Partizanit, e më pas, për një kohë të shkurtër ka luajtur edhe jashtë, pason në këtë post teknikun lezhjan Ridvan Kulli, i cili dha dorëheqje dy muaj më parë, pasi Besëlidhja u mundë në ndeshjen e “play-off”-it nga Tomori.
Presidenti Pasi kemi kontaktuar, përmes telefonit me presidentin e Besëlidhjes Gjokë Noka, ai pa as më të voglin heziton, na ka konfirmuar faktin se Sokol Meta është trajneri i ri i lezhjanëve, duke qenë i gatshëm për të folur për çdo detaj në lidhje me këtë çështje. Megjithatë, për momentin, i rëndësishëm është fakti se opinioni ka mësuar emrin e teknikut që do të drejtojë një prej skuadrave kryesore dhe më me traditë në Kategorinë e Parë, atë të Besëlidhjes. “Po, është e vërtetë, që trajneri i ri i Besëlidhjes është Sokol Meta. Është personi i duhur, që me punë dhe përkushtim, por edhe dëshirë dhe motivim për punën, që së bashku ta çojmë Besëlidhjen në Superligë. Për këtë jam i bindur, madje jo vetëm kaq. Por unë e deklaroj që sot, që lezhjanët vitin tjetër, jo vetëm që do të jenë në Superligë, por do të ngjiten, duke qenë “kampion” të Kategorisë së Parë. Kam një grup lojtarësh të shkëlqyer, që nga sezoni i kaluar, të cilin e kemi ruajtur dhe me ndonjë përforcim tjetër, gjatë rrugës, të jeni të bindur se Besëlidhja do të shkojë aty ku e ka patur gjithnjë traditë, pra mes më të mirave të futbollit shqiptar. Edhe me këtë grup lojtarësh që kam, jam i bindur se vitin tjetër do të jemi aty, ku e kemi merituar në fakt prej dy sezonesh, por ndoshta dhe fati nuk ka qenë me ne”, ka thënë mbrëmë për gazetën “Sporti Shqiptar”, presidenti i Besëlidhjes Gjokë Noka. Ky i fundit, duket më shumë se kurrë, i vendosur për të realizuar dhe bërë konkret projektin e tij për një Besëlidhje Superiore.
Stërvitja Pas gati dy muajsh pushim absolut, ekipi i Besëlidhjes, sot në orën 17.00 zbret për herë të parë në fushën e blertë, duke shënuar është edhe startin e përgatitjeve për sezonin e ardhshëm futbollistik. Kjo do të jetë séance e parë stërvitore për lezhjanët, ku edhe do të prezantohet trajneri i ri Sokol Meta së bashku me stafin e tij, por edhe grupi i lojtarëve, që do të vazhdojnë punën për të ngjitur Besëlidhjen në Superiore. Kështu nga sot, edhe Besëlidhja është në “ring” për sezonin e ri, me të njëjtat synime si më parë, por me një vendosmëri më të madhe se kurrë, se Superliga do të arrihet nga lezhjanët.
Mejdan ZHIVANI
