Shumë gjëra kanë ndryshuar gjatë dy javëve të fundit te skuadra e Manchester United, por ndryshimet do të prekin edhe objektivat që “djajtë e kuq” kishin në merkaton e janarit. Sipas të përditshmes britanike “The Express”, trajneri Ole Gunnar Solskjaer nuk do të vazhdojë në merkato me objektivat që kishte planifikuar Jose Mourinho.

Solskjaer duket se do të ndjekë një linjë tjetër, duke hequr dorë nga blerjet e Toby Alderweireld dhe Ivan Perisic, që trajneri i ri i United i konsideron të vjetër. Sipas mediave angleze, trajneri norvegjez synon më shumë afrimin e talenteve të rinj tek United, për të ndërtuar një ekip me yje, që të luajnë së bashku për vite me radhë dhe të nisë një epokë të re.

Për momentin ende nuk ka asnjë emër konkret se cilin synon të sjellë në merkaton e janarit trajneri i ri i United, por konfirmohet linja e re e tij. Mësohet se Solskjaer i ka paraqitur një listë me emra stafit drejtues të “djajve të kuq”. Në dy ndeshje në stolin e ekipit të Manchester United, trajneri norvegjez ka arritur dy fitore.