Pasditja e sotme do të jetë shumë e rëndësishme për Klubin e Futbollit Vllaznia. Themi kështu pasi do të zhvillohet një mbledhje e cila do të përcaktojë shumë gjëra për të ardhmen e tij. Bëhet fjalë për mbledhjen e Asamblesë së Përgjithshme të këtij klubi.
Ajo në fakt është Asambleja e rradhës por pritet të marrë disa vendime të rëndësishme që kanë të bëjnë me funksionimin e tij për vazhdimësinë. Kjo mbledhje do të nisë menjëherë pas përfundimit të mbledhjes së Këshillit Bashkiak dhe nuk përjashtohet mundësia që të zgjasë deri në orët e vona të darkës.
Pikat e rendit të ditës janë tre: E para, shtimi i kapitalit të kësaj shoqërie aksionere me shumën prej 550 milionësh, shumë e cila siç dihet është miratuar për këtë klub në buxhetin e Bashkisë Shkodër për vitin 2018.
Pika e dytë është ajo e rritjes së rrogave për tre pjestarë të këtij klubi, përgjegjësin teknik të Akademisë, trajnerin e ekipit B dhe atë të ekipit U-19.
Ndërkohë, pika e tretë është ajo e miratimit të buxhetit të KF Vllaznia sh.a për këtë vit.
