Kukësi duket tërësisht i rilindur nga ajo nisje shumë e dobët e kampionatit, ku koleksionoi katër humbje radhazi në start. Ulja në pankinë e Stavri Nicës ka nisur t’i japë frytet e veta dhe tani verilindorët nuk janë më në vendin e fundit kur është mbyllur një fazë e plotë.
Ndonëse janë ende në zonën e rrezikut, paraqitjet e javëve të fundit japin shpresë se skuadra do të vijojë ngjitjen edhe më tej. Fitorja e fundit ndaj Laçit tregoi se humbja ndaj Partizanit një javë më parë ishte një aksident dhe se Kukësi vërtet ka nisur të bëjë kthesën, jo vetëm në rezultate, por edhe në lojë.
Katër javët e parë të këtij sezoni, duket se nuk kanë lidhje me Kukësin. Kampionati i vërtetë i bluve ka nisur fill pas asaj fitoreje me Skënderbeun në javën e pestë, ku edhe u morën pikët e para.
Në pesë javët e fundit, Kukësi ka koleksionuar 10 pikë dhe rezulton se është ndër ekipet që po kalon formën më të mirë dhe është një ritëm i një skuadre që lufton për… titull.
Thuhet kështu, pasi në pesë javët e fundit, vetëm dy kryesuesit, Egnatia dhe Partizani, kanë bërë më mirë, të cilat kanë marrë nga 12 pikë, dy më shumë sesa verilindorët.
Të gjitha skuadrat e tjera janë poshtë tyre dhe në klub ky shihet si një sinjal që ekipi po funksionon dhe që mund të bëjnë akoma më mirë edhe në vijim. Gjithsesi, bëhet fjalë vetëm për shenja të mira që po jep ekipi, sepse nëse nuk vijohet me këtë ecuri, atëherë sërish situata mund të vështirësohet edhe më tej dhe klubi të zbresë në fund.
Trajneri Nica dhe skuadra gjithsesi janë të fokusuar tek ndeshja e së premtes me Vllazninë, ku natyrisht që do të kërkojnë një tjetër rezultat pozitiv, për të përmirësuar edhe më shumë gjendjen në renditje.
