Dueli i shqiptarëve në Serinë A mes Elseid Hysajt dhe Thomas Strakoshës është fituar nga mbrojtësi shqiptar, skuadar e të cilit triumfoi në ndeshjen kryesore të kësaj jave në kampionatin italian për të rimarrë kryesimin e tij.
Supersfida ka filluar menjëherë me ritëm të lartë dhe me një gol që pakkush e priste nga skuadra mike.
Ekipi i Thomas Srakoshës kaloi në avantazh që në minutën e 3 të takimit, kur Stefan De Vrij u shfaq në zonën kundërshtare duke devijuar sferën në rrjetën e portës së mbrojtur nga Reina.
Më pas Napoli u hodh i tëri në sulm, në kërkim të barazimit dhe e arriti vetëm në minutën e 44-t të takimit, kur Kajehon i shpëtoi mbulimit të mbrojtjes dhe pozicionit jashtë loje, për të dërguar topin në rrjetë, i vetëm para Strakoshës.
Në minutën e 54-t të ndeshjes vjen edhe goli i përmbysjes. Pas një aksioni të Mertens në krahun e djathtë, Uollas gaboi duke devijuar në portën e tij topin, edhe pse Strakosha dukej në pozicion për të bllokuar pasimin.
Një minutë më vonë, portieri shqiptar u detyrua të nxirrte përsëri topin nga rrjeta, këtë herë pas diagonales së Mario Rui të devijuar nga Zielinski.
Në minutën e 73 erdhi edhe goli i katërt, me autor Mertens, i cili mposhti pa vështirësi portierin shqiptar pasi i ishte shmangur pozicionit jashtë loje.
Rezultati 4-1 nuk ndryshoi deri në vërshëllimën përfundimtare, duke i dhënë një sukses të rëndësishëm Napolit që kaloi kësisoj një nga kundërshtarët më të vështirë dhe mori tri pikët që i duheshin për të kapërcyer përsëri Juventusin në kreun e renditjes së Serisë A.
Napoli-Lacio 4-1
44′ Kajehon, 54′ (ag) Uollas, 56′ Zielinski, 73′ Mertens / 3′ De Vrij
