Tifozët shqiptarë janë mësuar që të shohin ndryshime të vazhdueshme në pankinën e skuadrave të tyre dhe nuk është aspak çudi që tashmë kampionati shqiptar është një ndër ata ku teknikët ndryshohen më shpesh në gjithë botën. Tashmë këtë e vërteton edhe CIES, Observatori Europian për Futbollin, i cili rendit Kategorinë Superiore si të 9-n në botë për numrin e madh të trajnerëve që ndërron.
Sipas një studimi të kryer së fundmi sa i përket periudhës 2015-2019, rezulton se mesatarisht çdo klub shqiptar ka ndërruar 6,3 trajnerë në këtë periudhë kohore, duke qenë e 9-ta në botë dhe vetëm e katërta në kontinentin tonë, e kaluar nga Bosnjë Hercegovina, Qipro dhe Mali i Zi.
Normalisht, një gjë e tillë nuk duhet të çuditë, kur mendon se që nga fillimi i këtij seozni, vetëm Skënderbeu, Bylis dhe Vllaznia nuk kanë ndryshuar timonierë, ndërsa Tirana kryesuese është tani te trajneri i tretë i saj.
Po cila është skuadra që ka ndryshuar më shumë në këto 5 vite që janë marrë në shqyrtim nga CIES?
Te Kukësi, Safet Gjici është një president që njihet si i paduruar me trajnerët dhe ndërron shpesh. Edhe sipas CIES, ai ka ndërruar 9 të tillë më një kohëzgjatje mesatare pre 19,4 ndeshjesh. Por këtë radhë Gjici duhet të “kënaqet” me vendin e dytë, në barazim me Laçin që ka ndërruar po aq trajnerë por ka mesataren e “mbijetesës në pankinë” prej 19,6 ndeshjesh. Vendi i parë i shkon një tjëtër klubi, Flamurtarit, i cili nën drejtimin e Sinan Idrizit ka ndryshuar 11 trajnerë, me një mesatare prej 16 ndeshjesh për t’i dhënë lamtumirën ekipit.
Në listen e CiES janë klubet që kanë qëndruar në këto vite në Superiore pa rënë nga kategoria ndaj mungojnë emrat e Vllaznisë, Luftëtarit, Bylisit apo Tiranës. Në listën e Superiores rezulton se klubi me më pak ndryshime në pankinë është Skënderbeu, i cili ka ndërruar vetëm 4 trajnerë dhe ka një jetëgjatësi të tyre prej 43,8 ndeshjesh. /vipsport/
