Për Klubin e Futbollit Vllaznia kuptohet që ashtu si në çdo sektor tjetër të jetës në vend, janë ditë të vështira megjithatë përmes porosive për të qëndruar në karantinë e shmangur përkeqësimin e situatës, shpresohet shumë për një rikthim të shpejtë të normalitetit.
Por sakaq, dita e sotme do të jetë e veçantë për administratorin e tij Suad Lici. Ai feston 46 vjetorin e lindjes dhe gazeta “Shkodra Sport” i uron edhe 100 vite të tjera të lumtura.
Natyrisht që shumëkush e njeh më shumë si një futbollist të suksesshëm i cili ka kontribuar jo pak edhe në fitimin e dy titujve kampionë me Vllazninë, pikërisht në vitin 1998 dhe 2001, po ashtu të Kupës së Shqipërisë në vitin 2008 si dhe të dy Superkupave në vitet 1998 dhe 2001.
Me pesë trofe “mbi shpinë” ai ka shkruar emrin e tij në historinë e suksesshme të Vllaznisë dhe në fakt nuk ka qenë një lojtar dosido. Ai ka dhënë një kontribut të jashtëzakonshëm për fanellën kuqeblu në vitet 1992 deri më 2009 kur e mbylli karrierën teksa ka zhvilluar plot 314 ndeshje me Vllazninë dhe ka shënuar plot 50 gola.
© shkodrasport.com
