Sulmuesi 27 vjeçar shkodran që pak ditë më parë u shpall kampion i Iranit me ekipin e tij- Sepahan, “i ka shkelur syrin” Vllaznisë. Gjatë këtyre ditëve të qëndrimit të tij pranë familjes në Shkodër, Xhevahir Sukaj nuk ka munguar të rishprehë dashurinë e tij për t’u veshur sërish kuqeblu. Këtë gjë ai e ka deklaruar edhe në intervistat e dhëna për televizionet lokale të këtij qyteti. Sipas tij, “jam gati të sakrifikoj duke luajtur edhe pa lekë fare apo me një kontratë të vogël vetëm e vetëm që Vllaznia të ngrihet sërish dhe të luftojë për titullin kampion”. Ka mjaftuar kjo deklaratë e tij në mënyrë që drejtuesit e klubit shkodran të nxitojnë për ta kontaktuar dhe për t’i bërë një ofertë për të luajtur me Vllazninë.
KUptohet që ato nuk mund të bëjnë ndonjë “çmenduri” financiare por meqë vetë Sukaj ka thënë se është i gatshëm të sakrifikojë, kuptohet që për të ka gjithnjë vend në skuadër. Kuqeblutë në fakt sidomos në sezonin e fundit kanë vuajtur shumë në sulm dhe këtë e tregon qartë edhe numri shumë i vogël i golave të shënuar. Ditët në vazhdim do të tregojnë nëse dëshira e Sukajt për t’u rikthyer tek Vllaznia është një gjë e arritshme apo është thjesht deklaratë nostaligjike e një ish- futbollisti të saj dhe po ashtu edhe e një tifozi të zjarrtë i kësaj skuadre. Në fakt, mosha e tij e re të bën të mendosh se Sukaj do të kërkojë një tjetër aventurë jashtë vendit. Shpallja dy herë kampion në Iran natyrisht që është një sukses për të dhe kjo paraqitje mund t’i hapë rrugë edhe për ndonjë kontratë tjetër të majme po me këtë ekip apo dhe me ndonjë tjetër në Azinë e largët.
© shkodrasport.com
