Ka edhe shumë ndeshje përpara, është për t’u luajtur edhe më shumë se gjysma e kampionatit, por “lufta” e mbijetesës është më e egër se kurrë më parë që tani në Superiore. Dhe fundi mund të jetë mjaft i hidhur për ndonjë nga skuadra emblematike të futbollit shqiptar. “Drama” Tirana, që ishte krëjtësisht e papritur, rrezikon të përsëritet edhe në fund të këtij sezoni, pasi Vllaznia dhe Teuta janë shumë pranë humnerës.
Njëri mes dy qyteteve të mëdhenj, Shkodra dhe Durrësi, mund t’i mungojnë hartës së Superiores sezonin e ardhshëm.
Pa paragjykuar asnjë skuadër nga ato që synojnë qëndrimin në elitë, kuptohet që Lushnja ka misionin më të vështirë. Është shumë prapa me pikë dhe duket gati e pamundur që të lërë pas dy skuadra rivale. Duhet vlerësuar serioziteti që po tregon javë pas jave…
Shpërthimi i Luftëtarit në këto javë të fundit, me 3 fitore radhazi, ka bërë që kuotat e gjirokastritëve të rriten ndjeshëm sai takon mbijetesës. Katër pikët distancë me dy rivalet e tyre, Vllazninë dhe Teutën, i bëjnë të jenë më komodë dhe, nëse nuk humbasin ndonjë nga yjet e skuadrës, me shumë mundësi qëndrojnë në Superiore.
Nëse marrim në konsideratë ecurinë e deritanishme të këtyre katër skuadrave (nuk përjashtohet mundësia që edhe ndonjë tjetër të përfshihet në këtë grup), me atë çfarë është manifestuar në fushë në këto 16 javë, Luftëtari i meriton pikët që ka marrë, ndoshta edhe më shumë. Luan futboll më të bukur dhe premton për të ardhmen, gjithmonë nëse mbetet ky që është apo përforcohet, sepse largimi i Abazajt apo Bregut, do të prishte punë.
Vllaznia dhe Teuta nuk meritojnë asgjë më shumë se pozicioni aktuak, pasi nuk kanë bërë asgjë për t’u mbajtur mend në këtë kampionat. Shpresat janë te merkatoja e dimrit, por duket shumë e vështirë që transforimi i këtyre dy skuadrave të bëhet si me “magji”.
Njëra mes Vllaznisë dhe Teutës mund të përfundojë si Tirana sot, në Kategorinë e Parë. Vetëm një mrekulli i shpëton të dyja…Vipsport.al
