Ashtu si në javën e kaluar, edhe sot kanë shënuar sërish futbollistët shkodranë që luajnë për skuadrat e tjera të Superligës shqiptare. Dhe janë sërish Erjon Vucaj e Bekim Bala që kanë bërë një gjë të tillë. Por nëse goli i Balës nuk ka patur dhe aq vlerë ngaqë skuadra e tij në fund është mundur nga Dinamo, goli i Vucajt mund të rezultojë si më deçizivi i këtij kampionati. Ai ka shënuar për Laçin në minutat e para të pjesës së dytë duke i dhënë fitoren kësaj skuadre pikërisht ndaj Teutës kryesuese të kampionatit. Vucaj është një lojtar që po spikat tek Laçi prej tre sezonesh duke treguar aftësi shumë të mira goditëse nga jashtë zone, ashtu siç veproi edhe sot kur shënoi një gol shumë të bukur. Edhe Bala ka shënuar për Tiranën, golin e parë të bardhebluve në ndeshjen ndaj Dinamos me një gjuajtje jashtë zone. Por në fakt, ky gol nuk i ka vlejtur shumë skuadrës së tij ngaqë ajo në fund ka humbur ndaj ekipit të vendit të fundit në renditje. Golat e Vucajt dhe Balës tregojnë edhe njëherë tjetër se ata vazhdojnë ta thonë fjalën e tyre për ekipet ku luajnë. Ndonëse flitet prej kohësh për një rikthim të mundshëm të gjithë shkodranëve për sezonin e ardhshëm, kjo vështirë të ndodhë sepse këta futbollistë ndjehen mirë në skuadrat e tyre aktuale.
www.shkodrasport.com
