Qendërmbrojtësi i Vllaznisë, Arsen Sykaj ka vendosur të qëndrojë në skuadër të pakten deri në fund të sezonit futbollistik. Pavarësisht se lojtari në fjalë ka shprehur dëshirën e tij për t’u larguar për shkak se nuk ishte në një situatë të mirë me stafin teknik ai tani ka ndryshuar mendim. Natyrisht kjo vjen dhe pas këmbënguljes së drejtuesve të skuadrës shkodrane për të mos i dhënë lejekalimin Sykajt. Është pritur që ditën e djeshme ai të bisedonte me drejtuesit por situata tashmë duket e zgjidhur pasi ai do të jetë pjesë e kuqebluve. “Unë nuk kam biseduar akoma për të ardhmen time por me shumë mundësi unë do të jem lojtar i Vllaznisë dhe për pjesën tjetër të sezonit”, ka sqaruar Sykaj.
Aktivizimi
Pavarësisht se ai do të qëndrojë, aktivizimi i tij nga ana e trajnerit Rudi Vata mund të vihet në dyshim. Kjo për arsyen se tekniku e ka deklaruar haptazi që ka biseduar me Sykajn duke i thënë atij dhe pakënaqësitë apo preferencat e tij për të mos e aktivizuar. Por nga ana e tjetër, lojtari tregohet një profesionist i vërtetë që shikon punën e tij. “ Unë sigurisht që do të vazhdoj punën time për një punë sa më të mirë që të arrijmë rezultatet me Vllazninë. Nuk kam absolutisht asgjë me stafin dhe as me njeri. Besoj që gjërat do të normalizohen shumë shpejt”-vijon më tej Sykaj. Përsa i përket aktivizmit, Sykaj nuk shqetësohet në qoftëse do të luajë si titullar apo zëvëndësues. “ Mua nuk më shqetëson aspak aktivizimi. Ajo do të jetë një zgjedhje e trajnerit. Unë do të bëj maksimumin tim sa herë që të jem në fushën e lojës”.
Kombetarja
Gjatë këtyre ditëve Sykaj ka qenë i grumbulluar në zborin e kombetarës. Një futbollist i tillë është vlerësuar për ato çfarë ka treguar pikërisht me kuqeblutë si një qendërmbrojtës shumë i mirë. Sykaj beson se do të arrijë të zërë një vend dhe në kombetare për të përfaqësuar ngjyrat kuq e zi. “Për mua grumbullimi në zborin e kombetares ishte një eksperiencë shumë e mirë. Kemi mësuar shumë gjëra nga ky grumbullim dhe besoj se do të na shërbejë shumë dhe për të ardhmen. Përsa i dëshirës time shpresoj që një ditë luaj për ngjyrat kuq e zi”, ka përfunduar qendërmrbrojtësi i Vllaznisë, Arsen Sykaj.
ANTON ZALLI
