Një sezon i mbyllur në mënyrë fantastike në Kategorinë e Parë, teksa në këtë sezon zhurma vinte nga Tirana dhe rezultatet nga Kastrioti.
Në fund, të dyja ekipet janë ngjitur në të njëjtën javë zyrtarisht në Superiore, pas një dominimi të gjatë që realizuan në grupet përkatëse të Kategorisë së Parë.
Një meritë të madhe në arritjen e Kastriotit, padyshim që e ka trajneri Samuel Nikaj.
Zgjedhjet e tij në skuadrën krutane qëlluan ato të duhurat dhe suksesi mund të thuhet se erdhi i gjithi vetëm falë tyre.
Tashmë Nikaj mund të konsiderohet si një trajner i Superiores, pasi Kastrioti është një ekip që i përket elitës së futbollit shqiptar.
Ky sukses i arritur me Kastriotin ka bërë që shumë skuadra të interesohen për të. “Vip Sport” mëson se për Nikajn interesohen dy klube të elitës në futbollin kosovar dhe një klub me projekt serioz në Kategorinë e Parë.
Çdo gjë pritet të zyrtarizohet në javët në vazhdim dhe mbetet të shihen edhe përpjekjet e Kastriotit për të mbajtur trajnerin që i dhuroi suksesin e këtij sezoni. /vipsport/
