Zlatan Ibrahimoviç ishte vendimtar në ndeshjen e Milanit ndaj Veronës, pasi me golin e tij në fundin e ndeshjes, siguroi të paktën një pikë për kryesuesit e kampionatit italian. Por suedezi humbi gjithsesi një duel me portierin e Veronës, SIlvestri, i cili përdori një rreng psikologjik për të bërë suedezin të humbte një penallti që mund të kishte ndryshuar fatin e sfidës.
Ibra pati mundësinë të realizonte nga pika e bardhë, por para gjuajtjes, portieri iu drejtua suedezit duke e ngacmuar. “Të fundit e ke humbur apo jo?”, ishin fjalët e portierit, duke iu referuar gabimit të Ibrahimoviç ndaj Spartës së Pragës 10 ditë më parë. Futbollisti gjuajti më pas dhe gaboi, duke fluturuar topin mbi traversë.
Kjo ishte penalltia e dytë radhazi që humbiste, e treta në këtë sezon, që ka shtyrë lojtarin të ndryshojë mendje dhe t’i kthejë gjuajtjet nga pika e bardhë Frenk Kesi. “Me sa duket tjetrin do ta lë ta gjuajë Kesi. Fraza e SIlvestrit? Kishte të drejtë, edhe të fundit e kisha gabuar”, pranoi duke qeshur sulmuesi suedez pas sfidës. /vipsport/
