Vazhdojnë shkëndija mes Carlo Ancelotti dhe presidentit të La Ligës spanjolle, Javier Tebas. Pas fitores në fushën e Villarrealit, trajneri i Real Madridit kërcënoi se nuk do ta linte më skuadrën të luante nëse do të kishte më pak se 72 orë pushim (Merengues po vinin nga gjuajtja e penalltive kundër Atletico-s në ndeshjen e dytë të raundit të 16-shes të Ligës së Kampionëve të mërkurën në mbrëmje).
Përgjigja e Tebas mbërriti menjëherë në rrjetet sociale: “Carlo, jam i sigurt që Emilio (Butragueno) ju tha se La Liga kishte planifikuar ndeshjen e radhës kundër Leganés për të shtunën në orën 16:15 për t’ju dhënë më shumë kohë para gjysmëfinales (ndeshja e kthimit të Copa del Rey) kundër Real Sociedad.
Por Emilio i kërkoi drejtorit të garës që ta zhvendoste në orën 21:00 (e imagjinoj me dijeninë dhe autorizimin tuaj) për të favorizuar ata që vinin nga ekipet kombëtare. Dhe tani ka më pak se 72 orë nga bilbili i fundit i ndeshjes së së shtunës dhe fillimi i gjysmëfinales të së martës! Le të shkojë më e mira në finale”.
Pak javë më parë, Ancelotti, në konferencën për shtyp në prag të ndeshjes së parë gjysmëfinale të Kupës së Mbretit kundër Real Sociedad, sulmoi Tebas, i cili e kishte cilësuar Real Madridin si “një klub që qan”.
“Tebas flet shumë për Real Madridin dhe nuk respekton miliona tifozë të Madridit. Ka probleme më të rëndësishme në futbollin spanjoll. Presidenti i La Ligës duhet të fokusohet në zgjidhjen e tyre”.
