Ka shënuar plot 29 pikë në ndeshjen e sotme duke qenë jo vetëm pikëshënuesi më i mirë i Partizanit por edhe i krejt ndeshjes. E kemi fjalën për lojtarin e të kuqve, shkodranin Daniel Lekndreaj. Ai është parë tejet i motivuar gjatë gjithë takimit dhe sa herë që shënonte nuk mungonte as bërja e shenjës së telefonit.
Pas ndeshjes në një prononcim të dhënë për mediat, ai është shprehur: “Vërtetë mund të kërkoj falje tifozëve shkodranë për faktin që ndikova në humbjen e skuadrës së tyre, por sporti është një profesion dhe mua më fusin në lojë për të shënuar sa më shumë pikë dhe jo për të falur.
Sado që jam me Shkodrën, kam lindur në Shkodër, jam tifoz me Vllazninë por i shërbej Partizanit në këto momente dhe mundohem ta bëj sa më mirë këtë gjë”.
I pyetur për faktin që sa herë luan kundër Vllaznisë, ai duket shumë i motivuar, Danieli përgjigjet: “Në fakt nuk është e lehtë të luash kundër Vllaznisë, më fal kundër amerikanëve sepse kështu mund të quhet ky ekip dhe jo Vllazni, i kemi studiuar mirë dhe erdhi rezultati që dëshironim”.
Në këtë ndeshje bëri disa herë me shenjën e telefonit sa herë që shënonte dhe i pyetur se çfarë ka dashur të transmetojë përmes këtij gjesti, Daniel Lekndreaj përgjigjet: “Ai është telefoni i vëllait (ish- basketbollistit të Vllaznisë Dodë Lekndreaj), ma la me qera mua por më duhet t’ia kthej prapë. Një gjest thjesht për t’i kujtuar disave që ai është ende këtu, edhe pse është në Kanada ka lënë vëllain e vogël këtu për ta përfaqësuar”.
© shkodrasport.com
