Ndeshja e shtyrë për shkak të reshjeve të shiut Tërbuni-Besëlidhja, është zhvilluar ditën e sotme në Pukë. Stadiumi “Ismail Xhemali” ishte i mbuluar totalisht nga bora, por kjo nuk i pengoi aspak skuadrat të zbrisnin në fushë, dhe madje të dhuronin një ndeshje plot emocione. Pukjanët ishin ata që arritën të parët të zhbllokonin sfidën në minutën e 71-të me Sead Hoxhajn, i cili realizoi golin e parë, por ky gëzim zgjat vetëm pak, pasi në të 77-ën Miloti baraspeshon ndeshjen, duke shënuar për Besëlidhjen.
Pukjanët nuk i humbin shpresat dhe e kërkojnë me doemos golin e avantazhit, i cili nuk vonon. Dy minuta pasi lezhjanët barazuan, Donald Saliaj, realizon golin e dytë për të zotët e shpisë, dhe 2-1. Pavarësisht rasteve, i gjithë takimi u mbyll me këto shifra dhe tashmë Tërbuni i largohet fundit të tabelës, dhe aktualisht renditet në vendin e 4-t me 14 pikë, po aq sa Dinamo që mban vendin e pestë.
