U mbajt dje mbledhja e asamblesë së Vllaznia sh.a dhe debatet kanë qenë të forta mes anëtarëve dhe administratorit Suad Lici, por edhe dy zyrtarëve të tjerë të klubit, juristit Gëzim Selmani dhe financierit Petrit Zaganjori.
E vetmja pikë në rend të ditës, që ishte miratimi i pasqyrave financiare për 2018-ën, nuk u miratua, me pretendimin se materiali kishte shkelje ligjore.
Për të paktën dy orë diskutimet ishin të ashpra, kryesisht prej anëtarit të asamblesë Arbis Vjerdha, por edhe të tjerë, si Jona Leqejza apo Lush Marku. Shqetësuese u cilësua mungesa e bordit mbikëqyrës dhe keqmenaxhimi në parim i Vllaznia sh.a, borxhi i së cilës zyrtarisht ka kaluar 1 miliard e 500 milionë lekë të vjetër (pjesa më e madhe detyrime ndaj shtetit, sigurime shoqërore dhe tatime mbi pagën e lojtarëve).
Duke parë borxhin që sa vjen e thellohet, asambleja ka kërkuar një hetim për vitet 2017, 2018 dhe 2019, si dhe të riorganizohet komplet klubi, që nënkupton shpalljen e falimentit dhe ringritjen nga e para.
Dhe nëse ndodh kjo, do ta çonte Vllazninë në Kategorinë e Tretë dhe ky është një ngërç që nuk ka një zgjidhje tjetër sipas asamblesë.
Administratori Lici tha se gara nuk është e pastër në kampionat shqiptar, sepse skuadrat e tjera, duke përmendur Laçin, por edhe ekipe të tjera janë në informalitet të plotë, por edhe luajnë rëndë jashtë fushave të lojës, duke nënkuptuar që nga politika, federata dhe më së shumti arbitrat.
Kjo nuk është e vetmja akuzë, sepse administratori Lici tha se Vllaznia u rrëzua në Kategorinë e Parë nga lojtarët shkodranë. Anëtarët e asamblesë akuzuan për keqmenaxhim, duke kërkuar ndryshim të situatës.
NGËRÇI
E para që e mori fjalën ishte Jona Leqejza, anëtarë e asamblesë Vllaznia sh.a. Ajo propozoi që të mos miratoheshin pasqyrat financiare, pasi janë hasur shkelje ligjore. Jo vetëm kaq, pasi theksoi që të zvogëlohet edhe kapitali për të mbuluar humbjet e akumuluara.
“Pasqyrat financiare të mos miratohen. Ne nuk kemi përse i miratojmë, sepse janë në shkelje të nenit 134 të ligjit për shoqëritë tregtare. Këshilli Mbikëqyrës, duke mos ekzistuar, nuk raporton dhe nuk mban përgjegjësi për mosraportimin, formati nuk është i qenësishëm siç duhet të jetë sipas ligjit.
