Vllaznia iu gëzua barazimit në Kukës sepse në fund të fundit një pikë e marrë në transfertë ndaj kampionëve në fuqi të vendit, nuk është pak. Por, ka edhe nga ata që mendojnë ndryshe. Amarildo Belisha, ish- futbollisti i ekipit shkodran, në një prononcim për “Shkodra Sport” lëshon jo pak kritika për futbollistët aktualë të Vllaznisë të cilët sipas tij, duhet të paraqesin më shumë karakter në fushë.
“Në pamje të parë, barazimi në Kukës konsiderohet rezultat pozitiv dhe i tillë është por të mos harrojmë se edhe në këtë ndeshje ka patur problematika. Prej në rezultatin 0-2 të mos jesh në gjendje ta mbash atë, të mos arrish ta administrosh atë me këtë ekip që unë mendoj se është i mirë se ai i një sezoni më parë, do të thotë se nuk duhet të jemi aq shumë entuziastë. Unë pres më shumë nga futbollistët aktualë të Vllaznisë sepse duhet ta ndiejnë përgjegjësinë e veshjes së fanellës të kësaj skuadre. Kemi kërkuar një ekip me shkodranë, ja tek është ekipi me 99 për qind shkodranë por nuk ua lejoj këtyre shkodranëve që me ardh ekipi kundërshtar me fitu brenda në Shkodër, me luajt siç ua ka qejfi dhe mos me pasë as më të voglin reagim. Këta djem duhet të tregojnë karakter. Ndoshta nuk kanë gjendjen sportive më të mirë për momentin, por të paktën karakter duhet të shfaqin në fushë. Vjen Flamurtari të merr barazimin dhe nuk ka asnjëfarë gjaku e grinte në fushë. Shoh në minutën e 80-të që ekipi nuk e kalon mesin e fushës, ndonëse rezultati është 1-1, luan në fushën tënde megjithatë asnjëlloj grinte në fushë. Me Partizanin e njëjta situatë. Ndonëse në humbje ekipi, në minutën e 78-të, katër mbrojtësit e Vllaznisë luanin në vijë të drejtë dhe asnjëri prej tyre nuk shtyn përpara për të ndihmuar ekipin. Këto gabime janë të pafalshme. Për këtë arsye, unë e shoh disi me dyshim edhe përballjen me Skënderbeun, ekipin më të mirë padiskutim të kampionatit. Megjithatë, nëse gjërat përmirësohen dhe këto gabime korigjohen nga stafi i ri, edhe ndaj korçarëve mund të marrim një rezultat pozitiv”.
© shkodrasport.com
