Pavarësisht rritjes që ka patur sporti i çiklizmit në Shkodër vitet e fundit, sërish duket se mungon vëmenda e duhur ndaj këtij sporti. Kjo ka bërë që një kampion i madh i këtij sporti, Mjeshtri Sytki Tafili, të lëshojë një thirrje ndaj atyre që kanë diçka në dorë për të ndihmuar këtë sport me traditë. Për këtë arsye, kampioni i shquar i viteve ’80, pjestar i një brezi të artë sportistësh bashkë me të vëllanë Agimin, Brahim Syken e të tjerë, u bën apel biznesmenëve dhe jo vetëm, për të ndihmuar në rikthimin e traditës së këtij sporti.
“Sporti i çiklizmit, një ndër sportet më të bukura dhe padyshim më i adhuruari për qytetin e dashur të Shkodrës, në mungesë të financimit për këtë sport të disa “menefregistëve” që e kanë mbajtur gjithmonë në minimumin e stimulit financiar, po mbahet falë pasionit të sportistëve dhe familjeve të tyre që kanë kontribuar me të gjitha forcat. Mendoj që edhe sot e kësaj dite, akoma kështu vazhdon në një kohë që një biçikletë kushton, më e lira…2000 euro. Pyetja është që si ka mundësi kjo Shkodër me talentë të pafund, që ka mbajt në pëllëmbë të dorës një ekip çiklizmi duke u përfaqësuar denjësisht nëpër botë me krenari si qyteti i parë në Ballkan që kemi zhvilluar garën e Rrethin e parë Çiklistik”. Ndonëse në Itali prej disa vitesh, ai është në kontakt të vazhdueshëm me pjestarët e ekipit të sotëm të Vllaznisë dhe i di mjaft mirë vështirësitë që ato hasin. Për këtë arsye, edhe njëherë tjetër shton: “Çiklizmi do shumë punë dhe me të ardhurat e familjes nuk mbahet. Një ekip profesionist që përfaqëson një qytet me potencë siç është Shkodra, është gjynah që t’i hiqet bukë e gojës familjes për t’ua dhënë djemve të tyre e këtë e bëjnë nga pasioni i tyre duke bërë çmos që atë të ecin përpara. Ka disa vite që Leonard Kola, të cilin vërtetë e përshëndes për atë që po bën, fut në lojë të ardhurat e familjes së tij për këtë sport. Por trajneri e sportisti duhet të mendojnë vetëm si me u stërvit siç bën e gjithë bota. Nuk dua të zgjatem shumë por e përsëris, kush ka diçka në dorë duhet të ndihmojë këtë ekip që ka shumë të ardhme”.
© shkodrasport.com
