Pas zyrtarizimit nga ana e klubit të Kukësit mbi çmimet e biletave për kryendeshjen e kësaj jave ku verilindorët do të presin Partizanin, ditën e sotme ka reaguar edhe grupimi i ultrasve të kuq, “Ultras Guerrils”.
Ata shprehen se pavarësisht çmimit të palogjikshëm që Kukësi ka vendosur për ndeshjen e të premtes e cila do të luhet në Shkodër, asgjë nuk mund ta ndalojë pjesëmarrjen masive, në një ndeshje shumë të rëndësishme për fatet e sezonit.
“Pasioni i tifozerisë së Partizanit nuk ka çmim, e akoma më qesharake është të mendosh se rritja e çmimit të biletës do ta pengojë dyndjen masive në këtë ndeshje.
Kemi udhëtuar me mijëra kilometra atëherë kur ishim në ditët më të errëta të historisë së klubit ku veç vetëfinancimit të udhëtimeve tona në qytete e fshatra të largët të çdo kategorie, me aq sa mundeshim kontribuonim edhe për lojtarët tanë të pa paguar. Kemi sakrifikuar e vazhdojmë të sakrifikojmë sa herë është nevoja.
Fakti që dikush ka rritur çmimin e biletës me idenë se do pengojë tifozerinë e Partizanit, ose do të përfitojë duke pasur të sigurtë masivitetin tonë, nuk na shqetëson, irriton apo provokon, përkundrazi për ne është vlerësim. Kjo do të thotë që i tremben koreve e këngeve tona, i tmerron ngjyra e kuqe dhe flamujt qe valëviten, i tmerron uragani që krijohet kur tifozeria e kuqe dyndet ashtu siç di ajo !
Nuk na kanë bërë përshtypje në gjithë sezonin oraret e pafavorshme, ndeshjet e së premteve dhe të hënave e s’do na bëjë përshtypje as kësaj radhe.
Së fundi kemi një thirrje për tifozerinë e kuqe, mobilizohuni organizohuni dhe bashkohuni me transfertën më të madhe të këtyre fazave te para, ftoni miq e shokë tifozë të rinj e të vjetër dhe së bashku t’i japim këtij kampionati ngjyrën që meriton. 20 autobuza do të jenë në dispozicion të uraganit të kuq, forca kontribuoni dhe angazhohuni të gjithë që ta bëjmë këtë transfertë të mbahet mend gjatë !
S’ka askush që ne na ndalon …”, thuhej në deklaratën e ” Ultras Guerrils”.
