Interi e mbylli vitin 2019 me pikë të barabarta me Juven, në renditjen e Serisë A. Diferenca me kampionët është ngushtuar, por Antonio Konte e ka treguar në Torino, por edhe te Çelsi se është një specialist i viteve të para dhe mundësia që të thyejë diktaturën bardhezi është më shumë sesa thjesht fantazi, përkundrazi…
Gjithsesi, në mendjen e “Gjeneralit” qarkullojnë edhe disa “dhurata” që ai pret t’ia sjellin festat, duke nisur nga merkatoja, e deri te shpërqendrimi edhe më i madh i Juventusit nga aventura në Europë.
Dhurata e parë – Sigurisht që duke parë emergjencën totale në mesfushë, një përforcim këtu do të ishte një “armë” më shumë për Konten, ku edhe pse preferenca është “luftëtari” i periudhës juventine, Arturo Vidal, ndoshta “Gjenerali” do të kënaqej edhe me Kulusevskin e Parmës.
Dhurata e dytë – Interi është edhe më i fortë sesa është parë në këto dy muaj të fundit, pasi mungesat në këtë periudhë kohe të Barelës dhe Sensit e konfirmojnë këtë. Dy mesfushorët, të cilët ishin liderët e Interit deri në tetor, u dëmtuan, por falë grintës së Kontes, skuadra diti të ruajë katin më të lartë të renditjes edhe pa ta. Por imagjinoni sesa më të fortë mund të jenë me Sensin e Barelën…
Dhurata e tretë – Dhe së fundmi, ndonëse rivalë, Antonio Kontes tashmë nuk do t’i vinte keq sikur Juventusi të avanconte sa më larg që të jetë e mundur në Champions. Bardhezinjtë sivjet e kanë treguar se janë të përqendruar totalisht tek Europa, duke lënë disi pas dore kampionatin.
Dhe pse jo, sa më gjatë që të ecë Juvja në këtë turne, aq më rrugë të hapur përpara sheh Interi, për të rigjetur titullin kampion dhe për të shembur diktaturën e bardhezinjve në Serinë A./panorama-sport/
