Te Vllaznia nuk lëviz asgjë. Lojtarët vazhdojnë pushimet, trajneri Cungu pret sinjale nga drejtuesit. Aktualisht e ardhmja e skuadrës shkodrane është në udhëkryq. Disa lojtarë janë larguar, ndërkohë që nuk ka asnjë përforcim. Armando Cungu bën analizën e situatës aktuale, duke folur për “Supersport”, e cila vijon të jetë mjaft shqetësuese:
“Nuk është stresi i kampionatit, por është një periudhë organizimi, sidomos për Vllazninë që është me probleme. Duhet të jetë një situatë alarmante, pasi e keni parë që ekipi ka nevojë për ndërhyrje dhe ndërtimin e boshtit. Mirë që nuk po arrijmë të afrojmë lojtarë, por po na largohen edhe ata që kishim. Ndoshta nuk është vonë për të nisur stërvitjen, por jemi vonë për afrimet që duhet të vijnë nga kampionati shqiptar. Objektivat? Duhet të pyesni klubin për të ardhmen. Kam patur kontakte me administratorin dhe presim të ulemi të bisedojmë me kryetaren e bashkisë. Nuk ka ardhur ende ky takim dhe nuk e di përse, por unë jam në Shkodër që prej 3 javësh. Tom Doshi si sponsor i mundshëm i Vllaznisë? Nuk kam dëgjuar asgjë personalisht, por më kanë thënë të tjerët. Nuk ka rëndësi emri i personit, si në rastin konkret zoti Doshi, pasi çdo njeri është i mirëpritur për të ndihmuar Vllazninë.”
