Humbja e sotme në Korçë, në njëfarë mënyre ka qenë e pritshme në kampin shkodran nisur nga mungesat e shumta që ka patur Vllaznia për këtë ndeshje. Në fushë kanë qenë shumë lojtarë të rinj të cilët megjithatë kanë bërë një paraqitje të mirë. Edhe trajneri Armir Grima ka folur me tone pozitive pas ndeshjes në lidhje me paraqitjen e tyre. Për faqen zyrtare të klubit shkodran, ai ka thënë: “E dinim që ishte një ndeshje e vështirë ajo me Skënderbeun në Korçë. Vendasit kërkonin me ngulm pikët për të rimarrë kreun, ndërsa ne udhëtonim drejt Korçës me një ekip me shumë mungesa. Megjithatë, përgjithësisht jam i kënaqur nga paraqitja në fushën e lojës së djemve që u aktivizuan. Ata besoj u impenjuan maksimalisht me aftësitë e tyre. Fakti që për rreth 53 minuta nuk pësuam gol në fushën e Skënderbeut, tregon se edhe mbrojtja ka funksionuar. Edhe shënimi i golit, pavarësisht se në minutat e fundit të takimit, është shenjë pozitive. Tanimë kemi ruajtur edhe këtë javë vendin e 6-të. Të dielën do të kemi përballë Tomorin, në një ndeshje që ne po e përgatisim prej ditësh, madje duke lënë pushim edhe disa lojtarë. Trepikëshi është synimi ynë i vetëm dhe jemi të bindur se do ta marrim atë përballë tifozëve tanë të dielën”. Planet janë të qarta tashmë. Shkodranët mendojnë të ruajnë vendin e gjashtë në renditje dhe për këtë duhen së paku dy fitore në tre ndeshjet e fundit.
www.shkodrasport.com
