Trajneri i Boracit, Mladen Zizoviç, ka folur dje në konferencën për mediat para betejës së sotme kundër Egnatias për turin e parë të Ligës së Kampionëve.
Ish-fantazisti i Tiranës në periudhën 2010-2011 ka fjalë të mëdha për futbollin shqiptar, që e vlerëson shumë. Sipas tij, Bosnja është larg Shqipërisë sa i përket infrastrukturës. Në lidhje me Egnatian, trajneri i emëruar vetëm para pak javësh shprehet se rrogozhinasit kanë defekte she skuadra e tij do të përpiqet t’i shfrytëzojë.
“Kam luajtur një sezon me Tiranën dhe kam fituar Kupën e Shqipërisë. Tirana është klubi më i popullarizuar dhe më i mirë shqiptar, edhe pse Egnatia së fundmi ka marrë drejtimin. Shumica e njerëzve kanë paragjykime për futbollin shqiptar. 13 apo 14 vjet më parë kur isha atje, u fut shumë kapital privat në futboll, u investua shumë në infrastrukturë. Kur shikon stadiumet e tyre, ata kanë katër ose pesë arena. Ne nuk kemi arritur ende në atë nivel, shpresoj se do ta bëjmë. Së fundmi aty është luajtur edhe finalja e Ligës së Konferencës, e cila është një njohje e madhe e UEFA-s për futbollin shqiptar.
E pamë gjithashtu që Kombëtarja shqiptare mori pjesë në Kampionatin Evropian dhe luajti një rol të rëndësishëm në Gjermani. Për sa i përket formës sonë, rezultatet tregojnë se po punojmë mirë, po stërvitemi mirë dhe jemi shpërblyer me disa fitore, edhe pse kjo mund të mos jetë shumë e rëndësishme në periudhën përgatitore. Kemi ndërruar një numër të caktuar lojtarësh, kemi bërë rotacion në staf dhe e përsëris sërish, ndoshta jam i mërzitshëm, por na duhet kohë, të cilën për momentin nuk e kemi.
Megjithatë, besoj se mjaftoi që të njiheshim dhe të përgatiteshim në mënyrë adekuate për kundërshtarin shqiptar, që në vendin e vet ka fituar Kupën dhe titullin kampion. Edhe Egnatia ka mjaft defekte, të cilat do të përpiqemi t’i përdorim për të përfituar përpara ndeshjes së kthimit në Elbasan”, përfundoi Zizoviç
