Me miqësoren ndaj Burrelit, Vllaznia i ka dhënë fund miqësoreve dhe tashmë është fokusuar tek kampionati. Këtë gjë thotë edhe trajneri Hasan Lika i cili duket shumë i fokusuar tek përgatitja e ekipit për ndeshjen e parë, atë ndaj Erzenit që do të luhet këtë fundjavë.
“Me ndeshjet miqësore që kemi zhvilluar, kemi parë më nga afër gjendjen aktuale para rifillimit të sezonit. Unë jam i kënaqur me atë që skuadra ka dhënë në fushën e lojës në të gjitha ndeshjet e luajtura këtë muaj.
Mendoj se jemi gati për takimet e këtij sezoni, që për ne do të rinisin me një sfidë të vështirë në Shijak, dhe më pas me ndeshjen e kthimit të turit të dytë në Kupë me Kamzën”, kështu deklaroi trajneri Lika në një prononcim për “sportekspres.com”.
Ndërkohë, sa i takon merkatos, trajneri Lika është shprehur: “Skuadra është e plotësuar në organikë dhe ne ndjehemi plotësisht të gatshëm për të vazhduar ecurinë pozitive të pjesës së parë të sezonit. Mos afrimet në merkaton e janarit nuk zbehin aspak objektivin dhe optimizmin që kemi për t’u ngjitur në Kategorinë Superiore. Ky synim nuk mund të ndryshojë nga mosafrimet në merkato”.
© shkodrasport.com
