Dita e nesërme do të dhurojë një sfidë shumë interesante për kampionatin kombëtar të basketbollit për meshkuj, atë në mes Vllaznisë dhe Tiranës. Dy skuadrat më të mira të kampionatit kësisoj do të kenë mundësi të bëjnë “nxjemjen” para ndeshjeve të play off-it ku pritet të diskutojnë fatet e titullit kampion të këtij sezoni. Shkodranët, pavarësisht se ndodhen për momentin në vendin e dytë, kuptohet qartë se kanë si objektiv të shpallen sërish kampionë, çka do të ishte edhe hera e katërt rradhazi për ta. Edhe Tirana në fakt këtë gjë kërkon e kjo justifikohet edhe me shpenzimet e bëra këtë sezon. Në Shkodër gjithsesi ka besim se mund t’ia dalin. Besim që plotësohet më shumë edhe nga trajneri që kanë marrë kohët e fundit, kroati Jeronimo Sarin. Duke folur në lidhje me takimin e nesërm ndaj Tiranës, ai për “SHKODRA SPORT” është shprehur: “Besoj se ka për të qenë një ndeshje shumë interesante. Kjo është hera ime e parë që drejtoj skuadrën ndaj Tiranës megjithatë jam informuar se ka një ekip të mirë. Por kjo nuk do të thotë se nuk do të kërkojmë ta mundim. Madje për këtë kam ardhur në Shqipëri, të fitoj titullin kampion me Vllazninë. Dhe për ta arritur këtë gjë, padyshim që duhet të mundim Tiranën. Them se mundësitë i kemi. Nga ekipi im pres që ta përmirësojë edhe më shumë lojën e tij sepse mundësitë i ka. Edhe prania e një numri të madh tifozësh të Vllaznisë në pallatin e sportit, besoj se do të na ndihmojë shumë. Unë jam kroat dhe jam shumë i ndjeshëm ndaj tifozëve. Prandaj shpresoj që të gjithë sëbashku të gëzojmë jo vetëm pas kësaj ndeshje por pasi të shpallemi kampionë”. Gjërat janë të qarta. Njëkohësisht edhe dëshira e të gjithëve në Shkodër. Megjithatë, kjo nuk arrihet vetëm me fjalë. Për t’ia dalë, duhet mundur Tirana së pari nesër, e më pas të gjithë ekipet e tjera derisa të mbërrihet tek trofeu. Rruga duhet të jetë shumë e gjatë deri atje por jo e pamundur.
© shkodrasport.com
