Trajneri Edlir Tetova, analizoi humbjen 0-1 që skuadra e Egnatias, regjistroi në shtëpi ndaj Partizanit, në duelin e vlefshëm për Kupën e Shqipërisë. Në prononcimin e dhënë për emisionin “Super Gol”, tekniku durrsak ndër të tjera u shpreh:
“Çunat zhvilluar një ndeshje të mirë. U ndëshkuam nga një episod i rikuperushëm. Për atë kishim punuar, duke ditur formatin e lojës së Partizanit, kjo ishte e vetmja keqardhje. Të vjen keq për rastet e humbura, futbolli ky është, të shikojmë për të rikuperuar ndeshjen tjetër. Do të shikoni Egnatia tjetër në Tiranë, kam shumë besim që do ta kalojmë Partizanin.
I gjithë 35 minutshi i parë ishte në këmbët e Kasës, në manovrën tonë duhet ta çonte diku tjetër. Kur bën 3 gabime, kundërshtari merr masa. Me futjen e çunave të tjerë, kishim një fytyrë tjetër. Futëm Aleksin mes mbrojtësve, duhet të kishim superioritet me lojtarë dhe të ishim një kundër një në linjën e fundit.
Nuk po bënim diçka në fundin e lojës, ndikoi edhe efektiviteti i lojës, shumë minuta lojtarët e Partizanit ishin në tokë. Loja e futbollit nuk ka fund, do të jemi më rezultativ, kjo të jep kualifikimin ose fitoren. Shpresoj shumë dhe kam besim që çunat do t’ia dalin.
Ujkën dhe Alievin i kishim lënë bashkë, duke ditur që mbrojtësi i djathtë i Partizanit është qendror dhe do të ishin në vijë të drejtë. Ai e punoi mirë gjerësinë, deri diku. Problematika ishte Bakajako, që nuk e merrte pjesën mbrapa. Gjithë problemi ishte Kasa në pasim, po bënte gjithçka tjetër, që nuk ishte në formatin e një ekipi që luan në ½ e veta”, u shpreh trajneri i Egnatias.
