Website “transfermarkt” është i specializuar në merkaton e futbollistëve, vlerat e tyre në treg dhe shumë gjëra të tjera që kanë të bëjnë me këtë temë. Natyrisht që herëpashere, ky websit bën edhe ndryshimet e vlerave financiare të tregut të lojtarëve. Siç kemi bërë të ditur edhe ditën e djeshme, vlera e Vllaznisë aktualisht ka rënë me 300 mijë euro në krahasim me fillimin e sezonit, kjo nisur nga ecuria jo e mirë në kampionat. Po cilat janë vlerat aktuale të futbollistëve të saj dhe cili është më i vlerësuar në treg aktualisht nga kuqeblutë.
Në vend të parë është mesfushori Ardit Krymi, vlera e të cilit vlerësohet me 375 mijë euro. Në vend të dytë është mesfushori tjetër Erald Çinari që vlerësohet me 325 mijë euro. I treti është Nurudeen Orelesi me 300 mijë euro. Gilman Lika e ka vlerën 250 mijë euro dhe po kaq edhe Arlind Kalaja.
Në vend të gjashtë e të shtatë me të njëjtën vlerë janë Erjon Vucaj e Erdenis Gurishta. Pas tyre janë katër futbollistë me të njëjtën vlerë prej 200 mijë eurosh dhe pikërisht Denis Pjeshka, Florind Bardulla, Olsi Gocaj e Arsid Kruja.
Kjo është 11-shja e lojtarëve më të vlerësuar në treg tek Vllaznia. Menjëherë pas tyre vijnë Erind Selimaj, Antonio Marku e Alsid Tafili me 175 mijë euro. Ajo që çudit në vlerësimin e transfermarkt është ai për portierin Alen Sherri i cili është vetëm 20 vjeç dhe konsiderohet me shumë të ardhme por është vlerësuar vetëm 125 mijë euro. Ndoshta ngaqë nuk ka luajtur shumë ndeshje. Mbase duke luajtur rregullisht në të ardhmen, vlera e tij në treg do të vijë duke u rritur dhe kjo është e sigurtë.
© shkodrasport.com
