E nisi sezonin me Burrelin, më pas te Kastrioti dhe nga sot zyrtarizohet si trajneri i skuadrës së Devollit. Ky është durrsaku Stavri Nica, i cili duket se ka nisur një projekt të ri me bilishtarët të cilët duan që të ngjiten në Kategorinë e Parë këtë sezon.
Në fakt, Nica është një trajner që ka drejtuar kudo, duke provuar Kategorinë e Dytë, të Parën, por edhe Superioren. Madje, në shumë qytete të Shqipërisë është mjaft i njohur pasi ka punuar me klubet e tyre të futbollit.
Është vetë klubi i Devollit që jep njoftimin duke zyrtarizuar marrëveshjen me trajnerin Stavri Nica për pjesën e mbetur të sezonit. Ndërkohë, në Devoll presin edhe disa afrime cilësorë, e madje edhe lojtarë që më parë kanë qenë pjesë e skuadrave të Superiores./vipsport/
