Presidenti i Bayern Mynih, Uli Hoeness, ka reaguar ashpër sot në lidhje me të ardhmen e sulmuesit kolumbian James Rodriguez. I ardhur në vitin 2017 te kampionët e Gjermanisë në formë huazimi për dy vjet nga Real Madrid, sulmuesi 27-vjeçar ka luajtur vetëm 37 ndeshje me bavarezët.
James Rodriguez me fanellen e Bayern
Shumë pak për një lojtar nga i cili pritej më shumë, por që shumicën e kohës ka qëndruar në stol. Ndaj, numri 1 i ekipit bavarez, ka lëshuar sot një sinjal të qartë në lidhje me Rodriguez. “E ardhmja e tij varet nga trajneri Kovac. Nëse ai nuk ka ndërmend ta aktivizojë dhe e lë vazhdimisht në stol, as unë nuk kam ndërmend që të shpenzoj 42 milionë euro”, tha Hoeness.
Gjithsesi, presidenti bavarez i jep ende shpresë lojtarit: “Nëse Kovac e sheh si pjesë e skuadrës, duke e aktivizuar më shpesh, atëherë kontrata që kam me Real më jep të drejtë që ta blej në atë shifër në muajin maj.
Deri më tani nuk kemi marrë asnjë vendim përfundimtar për James Rodriguez. Gjithçka do të varet nga aktivizimi i tij, pasi ato parà unë mund t’i shpenzoj ndryshe”./telesport/
