Ndeshja e nesërme me Bylisin do të shënojë debutimin e Rudi Vatës në pankinën shkodrane. Ai vetë po e përjeton me shumë emocione këtë debutim në pankinë. Për më tepër në krye të skuadrës së zemrës dhe më së shumti, para tifozëve shkodranë. Të gjitha këto, vetë ish-kapiteni i kombëtares kuqezi kërkon t’i lërë mënjanë se tashmë prej tij pritet tjetër gjë: fitorja me Bylisin. Ai e ka të qartë këtë gjë. E ka të qartë se do ketë edhe disa probleme për ndërtimin e formacionit megjithatë nuk trembet prej tyre. Dëshiron që skuadra t’i bindet dhe vetë është i kënaqur me mënyrën si kanë shkuar gjërat gjatë këtyre ditëve që ai është trajneri i Vllaznisë. “Kjo është një ndeshje tepër e rëndësishme për mua. Skuadra mendoj se gëzon një përgatitje të mirë dhe prandaj kjo duhet të reflektohet edhe në fushën e lojës. Kam katër ditë që jam në krye të saj dhe besoj se tashmë Vllazninë e njoh mirë. Kjo njohje nuk është vetëm aktuale pasi këtë skuadër e ndjeki prej kohësh. Kemi disa probleme me lojtarë të ndryshëm për këtë ndeshje sepse Petroviç ka një problem në gishtat e këmbës, tek Djepaxhia po shfaqen problemet e vjetra të dëmtimeve, ndërkohë edhe Nimani e Hasani ende nuk janë të gatshëm për të luajtur. Megjithatë, duhet të mendojmë edhe pa to. Unë pres një Vllazni agresive, një skuadër me optimizëm në fushën e lojës sepse besoj se ajo po merr pamjen e duhur. Shoh njëfarë ndryshimi tek ajo nga gjendja e plogështisë në të cilën kishte rënë, tani e shoh disi më të çliruar dhe besoj se kjo do shoqërohet edhe me rezultatet e duhura në fushë”-ka thënë Vata në konferencën e sotme për shtyp. Por ndaj Bylisit nuk do jetë e lehtë. Vetëm 10 ditë më parë, ka patur një tjetër përballje me këtë skuadër për kupë dhe vetëm 0-0 në Shkodër. Rudi e di këtë gjë, por…. “Bylis ka një skuadër solide me futbollistë cilësorë në rradhët e saj. Ka një trajner me eksperiencë në krye të tij por këto besoj se nuk do vlejnë në ndeshjen e rradhës sepse në Shkodër duhet patjetër të flitet shkodranisht. Unë kam katër ditë në krye të skuadrës, shoh një përpjekje për të ndryshuar por publiku dhe gjithë të tjerët të mos presin ndryshime të mëdha nga ana ime si trajner. Gjërat s’mund të ndryshojnë për një jave. Duhet gradualisht të fus frymën time në ekip dhe jam shumë i kënaqur me reagimin e parë pozitiv që kam marrë nga skuadra këto ditë”-shton ai. Shumëkush mund të vërë në dyshim mungesën e eksperiencës së Vatës si trajner por duket se kjo do kompesohet me tjetër gjë. Më së shumti, me dëshirën e tij për të triumfuar sepse kështu ia ka dalë gjithmonë. “Jam njeri që jam mësuar të fitoj sepse kam punuar gjithnjë me besimin tek suksesi dhe prandaj më ka ecur mbarë. Unë nuk jetoj me ndjenjën e humbjes dhe prandaj besoj tek fitorja me Bylisin. Në lojë janë të tre rezultatet por ne duhet të mendojmë vetëm për fitore”. Nesër është një përballje e rëndësishme për Vatën dhe vetë ai gjatë këtyre ditëve ka marrë shumë urime por urimin më të bukur e ka marrë nga prindërit e tij prandaj deklaron: “Urimin ma të bukur e kam marrë nga nana dhe baba jem që më kanë thënë “Dalsh faqebardh”! po ashtu edhe dy djemtë e mi më kanë uruar për punën që kam nisur sepse tashmë janë në koherencë me punën dhe atë çfarë po bëj”.Gjergj KOLA
