Tre ndeshje, zero gola të pësuar. Uruguai edhe njëherë ka zhvilluar një ndeshje të përsosur në prapavijë dhe ditën e sotme radhën për të shënuar e kishte Luis Suarez, i cili është bërë uruguaiani që ka shënuar më shumë gola në Kupat e Botës, me shtatë të tillë në fitoren 3-0 ndaj Rusisë.
Ndeshja nisi shumë mirë dhe Uruguai gjeti menjëherë golin e avantazhit. Rusët nuk u pajtuan me atë situatë dhe sulmuan për të barazuar, por një karton i kuq i preu krahët vendasve.
Goli i Laxalt pak përpara se të përfundonte pjesa e parë vulosi fitoren e amerikano-jugorëve, që e mbyllin fazën e grupeve në krye dhe presin tani njërin mes Spanjës dhe Portugalisë. Në fund të takimit ishte edhe Cavani ai që trefishoi rezultatin duke fundosur akoma më shumë vendasit.
Ndërkohë Egjipti dhe Arabia Saudite largohen nga Kupa e Botës me jnë fitore 2-1 të Arabisë pas golit të sekondave të fundit.
Skuadrat e kishin siguruar largimin sido që të ishte rezultati në fund të ndeshjes dhe dukej se një barazim do të kënaqte të dyja palët që deri në atë moment nuk kishin asnjë pikë, por goli i Dawsari-t i dha fitoren arabëve.
Mohamed Salah largohet me një tjetër gol nga ky kompeticion, dhe këtë herë me një perlë tipike.
Pasi merr një top të gjatë nga mbrojtja, ylli i Liverpool sheh daljen e portierit dhe vendos të lëshojë një parabolë të përsosur me topin që përfundon në rrjetë.
Ndërkohë Arabia barazon rezultatin me një penallti në minutën e pestë shtesë të pjesës së parë, pasi kishte humbur një penallti disa minuta më parë.
Në pjesën e dytë ndeshja ishte e barabartë, por në sekondat e fundit të ndeshjes arabët shënojnë golin e fitores.
Një tjetër fakt historik është paraqitja e portierit të Egjiptit, El Hadary, portieri më i vjetër që ka shkelur në një Kupë Bote. Në pjesën e parë ai madje ka pritur edhe një penallti.
