Rudi Vata nuk është një emër shumë i dëshiruar në Institucionet më të larta futbollistike në vendin tonë. Arsyeja? Shkodrani flet troç dhe nuk ka frikë të përballet, larg servilizmit që jemi mësuar të shohim rëndomë. Në fakt, nëse ai do kishte bërë si të tjerët, mbase do të ishte në pozicione drejtuesi sot, por më mirë që kemi edhe njerëz të tillë.Ish-trajneri i Vllaznisë flet për Eduasportin.com në lidhje me gjendjen e shkodranëve dhe situatat që kanë përfshirë klubin kuqeblu.
Atij nuk i shpëton as afrimi i Sukajt e mungesa e koherencës e ish-trajnerit kuqeblu, Armando Cungut.
– Profesor, Sukaj u rikthye te Vllaznia. Në kohën kur ju drejtonit “u latë në baltë” nga ai. A mendoni se rikthimi i tij do të ndihmojë ekipin, nisur edhe nga forma aktuale?
– Te Vllaznia çfarëdo që të ndodhë nuk më duket çudi. Sukaj është investim i gabuar dhe pa ndonjë vlerë. Duke parë edhe mënyrën se si Partizani po e largon, tregon se kilometrat në futboll janë drejt fundit. Ka djem te rinj tek Akademia që mund të investohet, kjo garanton edhe të ardhmen e klubit. Mendimi im personal për Sukajn është vendimi që unë kam marrë nga ana profesionale. Në kampionatin shqiptar me një goditje nga distanca dhe me një penallti “alla Panenka” bëhesh lojtar i famshëm dhe i rëndësishëm.
– U “thye” edhe Cungu, në një paralelizëm, fjalët e tij kanë qenë pothuajse të përafërta me tuajat. Drejtuesit ndërhyjnë, ka mekanizma që s’lënë ekipin të ecë para. Duket se gjërat nuk kanë ndryshuar aspak në Shkodër…
– Unë kam drejtuar Vllazninë nga nëntori 2011 deri në prill 2012, vetëm 5 muaj. Filozofia ime e punës ka qenë totalisht e kundërt me atë të drejtuesve të atëhershëm të klubit. Kur kam marrë vendimin për tu larguar kam deklaruar me 19 pika problemet te Vllaznia, kam përmend personat me emër e mbiemër. Ata ishin aq të aftë për të organizuar problemet, por nuk ishin kurrë të aftë për t’i gjetur zgjidhje problemeve. Cungu ka pasur kohë, mbështetje dhe privilegjet e partisë e Bashkisë për t’i ndryshuar gjërat për mirë. Gjithmonë u ankua, por kurrë nuk u distancua.
– A jeni penduar ndonjëherë që keni marrë drejtimin e Vllaznisë në atë periudhë?
– Kurrë nuk jam penduar që kam pranuar drejtimin e Vllaznisë në atë kohë e atë situatë. Askush nuk guxoi të merrte drejtimin e klubit atë kohë. Unë pranova sepse jam mësuar të luftoj në jetë dhe për futbollin luftoj krejt lirisht.
Në jetë eksperiencat më të këqija të japin leksionet më të mira. Po të keni parasysh që për klubin që unë punoja kisha kundër të gjithë drejtuesit e lartë. Ata ishin angazhuar për të shkatërruar punën time. Duke i referuar kësaj, pozicioni që unë e lashë Vllazninë ishte thjesht një mrekulli.
– Vllaznia rrezikon sërish këtë sezon, mendoni se do të jetë “viti i katastrofës”?
– Vllaznia do ta ketë shumë të vështirë mbijetesën nëse skuadra nuk reagon pozitivisht që në ndeshjen e parë. Skuadra ka obligim të tregojë karakter e shpirt luftarak, duhet të jenë të bashkuar si kurrë më parë. Mua personalisht, Vllaznia më duket si skuadra më jetime e kampionatit.
– Trajnerët shqiptare po rendin drejt Kosovës, trajnerët e huaj po marrin ekipet shqiptare. Çfarë mendimi keni për këtë trend të ri?
– Shqipëria ka shumë trajnerë me “UEFA PRO” licencë, por për kampionatin shqiptar, siç duket nuk janë të vlefshëm. Fatmirësisht, disa janë punësuar në Kosovë. Trajnerët e huaj që vijnë në Shqipëri e ndihmojnë ambientin me mënyrën se si sillen, si organizohen dhe si i trajtojnë situatat profesionalisht. Ata paguhen mirë, por sjellin eksperiencën e tyre evropiane, kjo i shërben të ardhmes.
– Zgjedhjet e FSHF-së janë këtë vit, mendoni se Duka do të ketë ndonjë kandidat të fortë kundër?
– Do kisha shumë dëshirë që të ketë një ose dy kandidatë potentë. Ata duhet të jenë me integritet që të kenë platforma të veçanta. Unë mendoj se çdo institucion në Shqipëri ka nevojë për ndryshime pozitive dhe institucioni futbollit ka nevojë për njerëz të mirë me mendje të mirë të cilët mund të bëjnë gjëra të mira./EDS/
