Trajneri i Vllaznisë Rudi Vata është i bindur se skuadra e tij mund t’ia dalë të fitojë pasditen e nesërme ndaj Skënderbeut. Një besim që ai e bazon tek puna e bërë këto ditë, entuziasmi i skuadrës dhe kualitetet që ka në rradhët e saj. “Unë besoj se i kemi kualitetet e duhura për ta fituar këtë ndeshje. Kemi një grup të mirë lojtarësh, nbi të gjitha solid. Vetë përballja me një kundërshtar të tillë të motivon dhe prandaj nuk kam aspak frikë përpara kësaj ndeshje”-ka thënë ai.
Rëndësia e takimit është e madhe dhe përgjegjësia sidomos tek shkodranët më shumë ngaqë luajnë në fushën e tyre, përballë publikut të vet. Për trajnerin Vata e rëndësishme është që skuadra është përgatitur ashtu siç duhet për këtë ndeshje. “Rëndësia e takimit është e madhe dhe ne jemi përgatitur maksimalisht për ta kaluar me sukses këtë sfidë. Kemi pretendime serioze në rrugën tonë dhe prandaj do na duhet ta sfidojmë edhe këtë kundërshtar. Skuadra po vjen duke u konsoliduar, atmosfera është e mirë dhe unë besoj tek suksesi”-thotë ai. Me ardhjen e Vatës në krye të skuadrës, ajo ka pësuar disa ndryshime për mirë megjithatë prova e vërtetë duket se do jetë sot ndaj korçarëve.
